އެމްޕޮކްސް ފެތުރުމުގެ ބިރު އޮތްކަމަށް ބުނެ ޑަބްލިޔުއެޗްއޯގެ ޔޫރަޕްގެ ވެރިޔާ އިންޒާރު ދެއްވައިފި

ދުނިޔޭގެ ސިއްޙީ ޖަމްޢިއްޔާ (ޑަބްލިޔުއެޗްއޯ) ގެ ޔޫރަޕްގެ ސަރަޙައްދީ ޑިރެކްޓަރު ހާންސް ކްލޫގް ވަނީ މަންކީ ޕޮކްސް ނުވަތަ އެމްޕޮކްސް ފެތުރިދާނެކަމުގެ ބިރު އޮތްކަމަށް ބުނެ މުޅި ދުނިޔެއަށް އިންޒާރު ދެއްވައިފިއެވެ.

 މި ބަލި ކޮންމެ ގައުމަކަށްވެސް ވާސިލުވެދާނެކަމަށާއި، އެކަމަށް ހޭލާތިބުމަކީ ވަރަށް މުހިންމު ކަމެއްކަމަށް އޭނާ ވިދާޅުވެފައިވެއެވެ.

މިދިޔަ ބުރާސްފަތި ދުވަހު ސްވީޑަނުން ވަނީ އެފްރިކާގެ ބޭރުން އެމްޕޮކްސްގެ އެންމެ ބޮޑަށް ގައިން ގަޔަށް އަރާ ބާވަތުގެ ފުރަތަމަ ކޭސް ރިޕޯޓުކޮށްފައެވެ. މިއީ ޑަބްލިޔުއެޗްއޯ އިން މި ބަލި "ބައިނަލްއަޤްވާމީ ކަންބޮޑުވުމެއްގެ ގޮތުގައި" އިޢުލާނުކުރިތާ ދެވަނަ ދުވަހު ފެނުނު ކޭހެކެވެ.

ކްލޫގް ވަނީ އެކްސްގައި ކުރެއްވި ޕޯސްޓެއްގައި އެމްޕޮކްސް ކްލޭޑް 1 ޖެހުމުން ކްލޭޑް 2 އަށްވުރެ ނުރައްކާތެރި ކަމަށް ވިދާޅުވެފައެވެ. އަދި ދުނިޔޭގެ އެހެން ސަރަޙައްދުތަކުންވެސް މިބަލި ފެނުމަކީ ގުޅިފައިވާ މި ދުނިޔޭގައި ކުޑަވަގުތު ކޮޅެއްގެ ތެރޭގައި ހިނގާފާނެ ކަމެއްކަމަށްވެސް އޭނާ ވިދާޅުވެފައިވެއެވެ.

ސްވީޑަނުގައި ފެނުނު އެމްޕޮކްސް ކޭހާ ގުޅޭ ގޮތުން ކްލޫގް ވިދާޅުވެފައިވަނީ ބަލިޖެހުނު މީހާއަށް ފަރުވާ ދެމުންދާ ކަމަށާއި، ބަލިމީހާ އެކަހެރިކުރުމާއި ގުޅުން ހުރި މީހުން ދެނެގަތުން ފަދަ އާންމު ސިއްޙީ ފިޔަވަޅުތައް އަޅަމުންދާ ކަމަށެވެ.

2024 ވަނަ އަހަރު ފެށުނީއްސުރެ، އެފްރިކާގެ 12 އަށްވުރެ ގިނަ ޤައުމުތަކުން މި ބަލި ރިޕޯޓުކޮށްފައިވެއެވެ. ގާތުން ގުޅުން ބޭއްވުމުން ފެތުރޭ މި ބަލީގެ 90 އިންސައްތައަށްވުރެ ގިނަ ކޭސްތައް ރިޕޯޓުކޮށްފައިވަނީ ކޮންގޯ ޑިމޮކްރެޓިކް ރިޕަބްލިކުންނެވެ.