ދިރާސާ ކުރުމަކީ އިޖުތިމާއީ އަދި އިގްތިޞާދީ ކުރިއެރުމަށް ބާރުގަދަ ވަސީލަތެއް: ރައީސް މުއިއްޒު

ދިރާސާތަކުގެ އަލީގައި މަސައްކަތްތައް ބައްޓަންކުރެވިއްޖެނަމަ، އިޤްތިޞާދީގޮތުން ފުދުންތެރި ޤައުމަކަށް ދިއުމަށް ރާއްޖެއިން ކުރާ މަސައްކަތަށް ބޮޑެތި ޙައްލުތަކެއް ހޯދޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

"ތެވެލި" ކޮންފަރެންސްގައި ވާހަކަފުޅު ދައްކަވަމުން ރައީސް ވިދާޅުވީ، ދިރާސާއަކީ ޤައުމަށް ފައިދާހުރި ސިނާޢަތްތައް ކުރިއަރުވާ ފުދުންތެރި މުޖުތަމަޢެއް ބިނާކުރުމަށް ކުރެވޭނެ އެންމެ މުހިންމު މަސައްކަތްކަމަށެވެ.

ރާއްޖެފަދަ ކުޑަ ޤައުމަކަށް ހުރި ގޮންޖެހުންތައް ފާހަގަކުރައްވައި، މި މައްސަލަތަކަށް ޙައްލު ހޯދުމަށް ދިރާސާތަކުގެ މުހިންމުކަން ރައީސް ފާހަގަކުރެއްވިއެވެ. އަދި ޤައުމުގެ އިޤްތިޞާދީ ޙާލަތު ރަނގަޅުކުރުމަށް ކުރެވޭ މަސައްކަތްތަކުގައި ދިރާސާތަކުގެ ދައުރު މުހިންމުކަމަށް ވިދާޅުވިއެވެ.

ދިރާސާކުރުމާއި އިޖާދީ ވިސްނުންތަކަށް އިސްކަންދެއްވުމުގެ ގޮތުން ޚާއްޞަ ގްރާންޓެއް ދެއްވުމަށް ނިންމަވާފައިވާކަމަށް ރައީސް ވިދާޅުވިއެވެ. އަދި ސަރުކާރާއި ޕްރައިވެޓް ސެކްޓަރ އަދި ތަޢުލީމީ މަރުކަޒުތައް ގުޅިގެން މަސައްކަތްކުރުމުގެ މުހިންމުކަން ފާހަގަކުރެއްވިއެވެ.

ރާއްޖެއަކީ ކުރިމަގުގައި ނޮލެޖް ހަބަކަށް ހެދިދާނެކަމަށާއި، ސަރަޙައްދީ އަދި ދުނިޔޭގެ ފެންވަރުގައިވެސް ފާހަގަކުރެވޭ ދިރާސާތަކެއް ރާއްޖޭގައި ކުރިއަށްގެންދެވިދާނެކަމަށް ރައީސް ވިދާޅުވިއެވެ. މިކަމަށް ދިވެހި އަދި ބައިނަލްއަޤްވާމީ ދިރާސާވެރިންނަށް ރައީސް ގޮވާލެއްވިއެވެ.

ރައީސުލްޖުމްހޫރިއްޔާ ވަނީ ދިރާސާގެ މަސައްކަތްތައް ކުރިއެރުވުމުގައި ދިވެހިރާއްޖޭގެ ޤައުމީ ޔުނިވަރސިޓީއާއި ތަޢުލީމީ އިންސްޓިޓިއުޝަންތަކުން ކުރައްވަމުންދާ މަސައްކަތްތައް ފާހަގަކުރައްވާ އެފަރާތްތަކަށް ޝުކުރުދަންނަވާފައެވެ.