ކުރިއަށް އޮތް ދުވަސްތަކުގައި ދައުލަތުގެ ރިޒާވް ރަނގަޅުވާނެ ކަމަށް އެމްއެމްއޭ އިން ބުނެފި

ޖުލައި މަސް ނިމުނު އިރު ދައުލަތުގެ ރިޒާވް ދަށަށް ދިޔަ ނަމަވެސް، ކުރިއަށް އޮތް ދުވަސްތަކުގައި ރިޒާވް ރަނގަޅުވާނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.

ރާއްޖެއަށް ބޭނުންވާ މުދަލުގެ ބާވަތްތަކާއި އެނޫންވެސް ކަންކަމުގައި ބޭނުންކުރަން ހުންނަ ރިޒާވް ދަށަށް ދިއުމާ ގުޅޭގޮތުން ދައުރުވަމުންދާ ވާހަކަތަކާ ގުޅިގެން އެމްއެމްއޭ އިން ނެރުނު ރަޢުޔުގައި ބުނެފައިވަނީ، މިހިނގާ އޮގަސްޓް މަސް ނިމޭއިރު ދައުލަތުގެ ރިޒާވް ރަނގަޅުވާނެ ކަމަށް ލަފާކުރެވޭ ކަމަށެވެ.

އެމްއެމްއޭ އިން ހާމަކޮށްފައިވާ ގޮތުގައި، ކޮވިޑާ ގުޅިގެން ކުރިމަތިވި ދަތިތަކާ ގުޅިގެން މާލީ ވުޒާރާއާއެކު 2019 ވަނަ އަހަރު ގާއިމްކުރި އެއްބަސްވުމެއްގެ ދަށުން ސޮވެރިން ޑިވެލޮޕްމެންޓް ފަންޑަށް ޖަމާކުރެވޭ ޑޮލަރު އެމްއެމްއޭ އަށް މާރުކުރުމަށްފަހު ބޭނުންކުރެވޭ ރިޒާވްގައި ހިމަނާފައިވެއެވެ. ނަމަވެސް 2023 ވަނަ އަހަރުގެ ޑިސެމްބަރު މަހުން ފެށިގެން ފައިސާ މާރުކުރުމުގެ ބަދަލުގައި ޑޮލަރުން ބެހެއްޓުމަށް ނިންމައި ޑޮލަރުން ފައިސާ ޖަމާކުރަމުން އައިސްފައިވާ ކަމަށް އެމްއެމްއޭ އިން ބުނެފައިވެއެވެ.

މިހާރު އެސްޑީއެފްގައި ބޭނުންކުރެވޭގޮތަށް 65 މިލިއަން ޑޮލަރު ހުރި ކަމަށް އެމްއެމްއޭ އިން ބުނެފައިވެއެވެ. އަދި ޖުލައި މަހުގެ ނިޔަލަށް ބޭނުންކުރެވޭ ރިޒާވްގައި 45 މިލިއަން ޑޮލަރު ހުރިއިރު، އެ އަދަދު ގުނާފައިވަނީ އެސްޑީއެފްގައި ހުރި 65 މިލިއަން ޑޮލަރު ނުލައި ކަމަށް އެމްއެމްއޭ އިން ފާހަގަކޮށްފައިވެއެވެ.

އެމްއެމްއޭ އިން އިތުރަށް ބުނެފައިވަނީ ކުރިއަށް އޮތީ ރާއްޖޭގެ ފަތުރުވެރިކަމުގެ ސިނާއަތުގެ ހައި ސީޒަން ކަމުން ކުރިއަށް އޮތް ތަނުގައި ރިޒާވް އެދެވޭ އަދަދަކަށް އިތުރުވާނެ ކަމަށް ލަފާކުރެވޭ ކަމަށެވެ.

ހަމަ އެއާއެކު އެމްއެމްއޭ އިން މިހާރުވެސް އަންނަނީ ބޭރުފައިސާގެ މުއާމަލާތްތަކަށް ބޭނުންވާ ފައިސާ ހޯދުމަށް ބޭރުގެ އެކި ފަރާތްތަކާއެކު މުއާމަލާތްތައް ކުރަމުންނެވެ. މިގޮތުން ކުރެވެމުންދިޔަ މަސައްކަތްތަކުން ބޭރުގެ ސްވޮޕްލައިނަކުން ވަރަށް އަވަހަށް 400 މިލިއަން ޑޮލަރާ ހަމައަށް ފައިނޭންސް ހޯދުމުގެ ފުރުސަތު ލިބިގެންދާނެ ކަމަށް އެމްއެމްއޭ އިން ބުނެފައިވެއެވެ.