ރަޝިޔާއިން އަނެއްކާވެސް ޔޫކްރެއިނަށް ބެލިސްޓިކް މިސައިލް ޙަމަލާއެއްދީފި

ރަޝިޔާއިން އަނެއްކާވެސް ޔޫކްރެއިނަށް ބެލިސްޓިކް މިސައިލް ޙަމަލާއެއް ދީފިއެވެ. ޔޫކްރެއިންގެ ވެރިރަށް ކީވަށް އަމާޒުކޮށް ދެވުނު މި ޙަމަލާއަކީ މި މަހު ޔޫކްރެއިނަށް ދެވުނު ތިންވަނަ ބެލިސްޓިކް މިސައިލް ޙަމަލާއެވެ.

ޔޫކްރެއިންގެ އަސްކަރިއްޔާއިން ހާމަކުރި އިބްތިދާއީ ތަފާސްހިސާބުތަކަށް ބަލާއިރު، މި މަހު ރަޝިޔާއިން ދިން ގިނަ މިސައިލް ޙަމަލާތަކެއް ވަނީ އަމާޒަށް ވާޞިލުވުމުގެ ކުރިން ނައްތާލެވިފައެވެ. އާދީއްތަ ދުވަހުގެ ޙަމަލާއަކީ މި މަހުގެ ތިންވަނަ ބެލިސްޓިކް ޙަމަލާކަން ފާހަގަކޮށް، ޔޫކްރެއިން އަސްކަރިއްޔާއިން ބުނެފައިވަނީ މިފަދަ ކޮންމެ ޙަމަލާއަކަށްފަހު ދެވަނަ ޙަމަލާ ދިނުމަށް ހަ ދުވަހުގެ މުއްދަތެއް ނަގާ ކަމަށެވެ. އަދި ރަޝިޔާއިން ބޭނުންކުރަމުންދަނީ އުތުރު ކޮރެއާއިން އުފައްދާފައިވާ ބެލިސްޓިކް މިސައިލްތައް ކަމަށް ޔޫކްރެއިނުން ތުހުމަތުކުރެއެވެ.

ރަޝިޔާއިން ޔޫކްރެއިނަށް އެންމެ ފަހުން ދިން ވައިގެ ޙަމަލާތަކުގެ ތެރެއިން، އެ ޤައުމުގެ އެކި ސަރަޙައްދުތަކުން ފަސް ޑްރޯންއާއި އަށް މިސައިލް ވައްޓާލެވިފައިވާ ކަމަށްވެސް ޔޫކްރެއިން އަސްކަރިއްޔާއިން މަޢުލޫމާތު ދީފައިވެއެވެ. އާދީއްތަ ދުވަހުގެ ހެނދުނު ރަޝިޔާއިން ޔޫކްރެއިނަށް އަމާޒުކޮށް ފޮނުވާލީ ތިން ބެލިސްޓިކް މިސައިލާއި، ތިން ކްރޫޒް މިސައިލާއި، އަދި ދެ އެއަރކްރާފްޓް މިސައިލެވެ. ޔޫކްރެއިން އަސްކަރިއްޔާއިން ބުނެފައިވަނީ އޭގެ ތެރެއިން ފަސް މިސައިލް ވައްޓާލެވުނު ކަމަށާއި އަނެއް ތިން މިސައިލް އަމާޒަށް ވާޞިލުނުވި ކަމަށެވެ.

ޔޫކްރެއިންގެ އިސް އޮފިޝަލުންގެ ބަހުން، މި ޙަމަލާތަކުގައި އެއްވެސް ފަރުދަކަށް އަނިޔާވެފައިވާކަމުގެ މަޢުލޫމާތެއް ލިބިފައިނުވެއެވެ. ނަމަވެސް، އިމާރާތްތަކަށް ތަފާތު މިންވަރުތަކުގައި ގެއްލުން ލިބިފައިވާކަން ފާހަގަކުރެވިފައިވެއެވެ.

ޔޫކްރެއިންގެ ރައީސް ވޮލޮޑިމީރް ޒެލެންސްކީ ވަނީ، ރަޝިޔާއިން ޢާންމު ރައްޔިތުން ދިރިއުޅޭ ސަރަޙައްދުތަކަށް ޙަމަލާދެނީ، ޤަޞްދުގައި މީހުންގެ ހިތްތަކުގައި ބިރުވެރިކަން އުފެއްދުމަށްކަމުގެ ވާހަކަ އަލުން ތަކުރާރުކުރައްވާފައެވެ. އަދި ވޭތުވެދިޔަ ހަފުތާގައި އެކަނި، ރަޝިޔާއިން ޔޫކްރެއިނަށް 40 މިސައިލް ޙަމަލާއާއި، 750 ބޮމުގެ ޙަމަލާ، އަދި 200 ޑްރޯން ޙަމަލާ ދީފައިވާކަމަށް ޒެލެންސްކީ ހާމަކުރެއްވިއެވެ.

ރަޝިޔާއިން "ޚާއްޞަ އަސްކަރީ ޢަމަލިއްޔާތު" ގެ ނަމުގައި ޔޫކްރެއިނަށް އަރައިގަތީ 2022 ވަނަ އަހަރުގެ ފެބްރުއަރީ މަހުގެ 24 ވަނަ ދުވަހުއެވެ. ދެ އަހަރަށްވުރެ ދިގު މުއްދަތަކަށް މި ހަނގުރާމަ ދެމިގެންގޮސްފައިވާއިރު، ޔޫކްރެއިންގެ އިރުއުތުރު ސަރަޙައްދުގެ 18 އިންސައްތަ މިހާރު ވަނީ ރަޝިޔާގެ ބާރުގެ ދަށަށް ގެންގޮސްފައެވެ. ހުޅަނގުގެ ޤައުމުތަކުގެ އެހީތެރިކަމާއެކު ރަޝިޔާއާ ދެކޮޅަށް ހަނގުރާމަ ކުރަމުންދާ ޔޫކްރެއިނުން ވަނީ މި މަހުގެ 6 ވަނަ ދުވަހު ސަރަޙައްދީ ރޮނގު ހުރަސްކޮށް، ރަޝިޔާގެ ކްރިމިއާ އަށް އަރައިގަނެފައެވެ.