ދިވެހި ރާއްޖޭގެ ރައީސުލް ޖުމްހޫރިއްޔާ ޑރ މުހައްމަދު މުޢިއްޒު
ކައުންސިލްތަކުގެ ބައި-އިލެކްޝަން ބޭއްވުމާ ގުޅޭގޮތުން ޤާނޫނަށް ގެނެވުނު އިޞްލާޙު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަޞްދީޤުކުރައްވައިފިއެވެ.
މި އިޞްލާޙަކީ، މި މަހުގެ 7 ވަނަ ދުވަހު ބޭއްވުނު ރައްޔިތުންގެ މަޖިލީހުގެ ދެވަނަ ދައުރުގެ 25 ވަނަ ޖަލްސާއިން ފާސްކުރެއްވި ބިލެކެވެ.
މި އިޞްލާޙުގެ މައިގަނޑު ބަދަލުތަކުގެ ތެރޭގައި ހިމެނެނީ:
1. އަތޮޅު ކައުންސިލުގެ ރައީސްގެ މަޤާމާއި، ރަށު އަދި ސިޓީ ކައުންސިލުގެ މެންބަރުންގެ ގޮނޑި ހުސްވުމުން ބައި-އިލެކްޝަން ބޭއްވުމުގެ މުއްދަތު ކަނޑައެޅުން:
- މަޤާމު ހުސްވާތާ 14 ދުވަހުގެ ތެރޭގައި ލޯކަލް ގަވަރމަންޓް އޮތޯރިޓީން އިލެކްޝަންސް ކޮމިޝަނަށް އަންގަންވާނެއެވެ.
- މި އެންގުން އަންގާތާ ގިނަވެގެން 183 ދުވަހުގެ ތެރޭގައި ހުސްވެފައިވާ ގޮނޑިއަށް މެންބަރަކު އިންތިޚާބުކުރަންވާނެއެވެ.
2. އިސްތިސްނާ ހާލަތް:
- ކައުންސިލުގެ އުމުރުގެ ބާކީ އޮތީ 365 ދުވަސް ނުވަތަ އެއަށްވުރެ ކުރު މުއްދަތެއްނަމަ، ހުސްވި މަޤާމަށް މެންބަރަކު އިންތިޚާބުކުރުން ލާޒިމެއް ނޫނެވެ.
3. އަތޮޅު ކައުންސިލުގެ ނައިބުރައީސް، ރަށު ކައުންސިލްގެ ނައިބުރައީސް، އަދި ސިޓީ ކައުންސިލުގެ ޑެޕިއުޓީ މޭޔަރުގެ މަޤާމު ހުސްވުމުން ޢަމަލުކުރާނެ ގޮތް:
- މަޤާމު ހުސްވާތާ 30 ދުވަހުގެ ތެރޭގައި، ޤާނޫނުގައި ކުރިން ބަޔާންކޮށްފައިވާ ގޮތުގެމަތިން އެ މަޤާމަށް މެންބަރަކު އިންތިޚާބުކުރަންވާނެއެވެ.
އޭގެ އިތުރުން، ކައުންސިލުގެ މެންބަރެއްގެ މަޤާމު ހުސްވުމުގެ ސަބަބުން ކައުންސިލްގެ ބައްދަލުވުމެއް ބޭއްވުމަށް ބޭނުންވާ ޤާނޫނީ އަދަދު ހަމަވާ މިންވަރަށް އެ ކައުންސިލުގައި މެންބަރުން ނެތް ހާލަތެއްގައި، އެފަދައިން މެންބަރެއްގެ ގޮނޑި ހުސްވެއްޖެކަން ލޯކަލް ގަވަރމަންޓް އޮތޯރިޓީން އިލެކްޝަންސް ކޮމިޝަނަށް އަންގާތާ 60 ދުވަހުގެ ތެރޭގައި ބައި-އިލެކްޝަން ބާއްވައި މެންބަރުން އިންތިޚާބު ކުރުމަށްވެސް ބިލުގައި ބަޔާންކޮށްފައިވެއެވެ.
ކޮމެންޓް