އައިސް ޕްލާންޓްތައް ހަވާލުކުރެވެންދެން މަސްވެރިންނަށް މެދުނުކެނޑި އައިސް ފޯރުކޮށްދޭނަން: ފެނަކަ

އައިސް ޕްލާންޓްތަކުގެ ހިންގުން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އާ ހަވާލުކުރެވެންދެން، މަސްވެރިންނަށް މެދުނުކެނޑި އައިސް ފޯރުކޮށްދޭނެކަމުގެ ޔަޤީންކަން ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުޢާޒު މުޙައްމަދު ރަޝީދު ދެއްވައިފިއެވެ.

މި ބަދަލާ ގުޅިގެން އިންތިޒާމްތައް ހަމަޖެއްސުމަށް މަސްވެރިކަމާބެހޭ ވަޒީރު އަޙްމަދު ޝިޔާމާއި ފެނަކަ ކޯޕަރޭޝަންގެ އިސްވެރިންނާއެކު ބޭއްވުނު ބައްދަލުވުމެއްގައި މުޢާޒު މި ވާހަކަ ވިދާޅުވިއެވެ.

ފެނަކައިން އައިސްޕްލާންޓްތައް ހިންގުން ހުއްޓާލަން ނިންމިކަން މި މަހު އިޢުލާންކުރިއެވެ. މުޢާޒު ވިދާޅުވި ގޮތުގައި އައިސްޕްލާންޓްތައް ހިންގުމަކީ ކުންފުނީގެ ޚިދުމަތުގެ އަމާޒުން ބޭރު މަސައްކަތެއް ކަމަށާއި، ކުންފުނީގެ މާލީ ހާލަތަށް ބަލާއިރު މި ޚިދުމަތް ދިނުމަކީ ވަރަށް ޚަރަދު ބޮޑު ކަމެކެވެ.

އިތުރަށް މުޢާޒު ހާމަކުރެއްވި ގޮތުގައި މި ޚިދުމަތް ދިނުމުގެ ސަބަބުން ކުންފުންޏަށް މަހަކު 12 މިލިއަން ރުފިޔާއަށްވުރެ ގިނަ އަދަދެއްގެ ގެއްލުން ވަމުންދެއެވެ. މި މައްސަލަ ޙައްލުކުރުމަށް މިފްކޯއާއި ކަމާގުޅުންހުރި އެހެނިހެން އިދާރާތަކާއެކު މަޝްވަރާކުރުމަށްފަހު، ފެނަކައިން އައިސްޕްލާންޓްތައް ހިންގުން ހުއްޓާލުމަށް ނިންމާފައިވާ ކަމަށް އޭނާ ވިދާޅުވިއެވެ.

ފެނަކައިން 25 ރަށެއްގައި އައިސް ޕްލާންޓް ހިންގުމުގެ މަސައްކަތް ކުރިއަށް ގެންދެއެވެ. މީގެ ތެރޭގައި އެކަށީގެންވާ ފެންވަރުގައި ޚިދުމަތް ނުދެވޭ ޕްލާންޓްތައްވެސް ހިމެނެއެވެ. އެހެންނަމަވެސް، ކުންފުނިން މުވައްޒަފުންގެ މުސާރައާއި އެހެނިހެން ހިންގުމުގެ ޚަރަދުތަކަށް މަތީ އަދަދެއްގެ ފައިސާ ހޭދަކުރަމުން ގެންދެއެވެ.

ފެނަކައިން ޚަރަދުތައް ކުޑަކުރުމަށްޓަކައި ގިނަގުނަ ފިޔަވަޅުތަކެއް އަޅަމުން ދާއިރު، އެ ކުންފުނީގެ މައިގަނޑު އަމާޒަކީ 2027 ވަނަ އަހަރު ނިމުމުގެ ކުރިން ދަރަނިތައް އަދާކޮށް ނިންމައި، ފައިދާ ލިބޭ ކުންފުންޏަކަށް ބަދަލުވުމެވެ.