އެމްޕޮކްސްގެ އަލާމާތްތަކަށް ފަރުވާދެވޭނެކަމަށް އެޗްޕީއޭއިން ބުނެފި

އެމްޕޮކްސް ބަލީގެ ސަބަބުން ދުނިޔޭގެ ސިއްހަތު ޖަމުއިއްޔާއިން ވަނީ ކުއްލި ހާލަތު އިއުލާނުކޮށްފައި

ދުނިޔޭގައި ފެތުރެމުންދާ އެމްޕޮކްސްގެ އަލާމާތްތަކަށް ރާއްޖޭގައި ފަރުވާދެވޭނެ ގާބިލުކަން ހުރިކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނެފިއެވެ.

މިއަދު ސިއްހީ ވުޒާރާގައި ބޭއްވި މަޢުލޫމާތު ސެޝަނެއްގައި އެޗްޕީއޭއިން ބުނީ، އެމްޕޮކްސްއަށް ސީދާ ވެކްސިނެއް ނެތްނަމަވެސް، އެ ބަލީގެ އަލާމާތްތަކަށް ސަޕޯޓިވް ފަރުވާ ދެވޭނެ ކަމަށެވެ.

އެމްޕޮކްސްގެ އަލާމާތްތަކުގެ ތެރޭގައި ހުން އައުމާއި، ތުރުތުރު އެޅުމާއި، ބިހި ނެގުމާއި، ފޮޅުލުމާއި، ކަރުގައި ރިއްސުމާއި، ވަރުބަލިވުމާއި އަދި މަސްތަކުގައި ރިއްސުން ހިމެނެއެވެ. މި ބައްޔަށް ޕީސީއާރު ޓެސްޓު ހަދާނެކަމަށާއި، ބައެއް ހާލަތްތަކުގައި ބަލިޖެހިފައިވާ ފަރާތެއްގެ ބިހިން ޓެސްޓު ހެދުމަށް ކުރަމަގާލި ނަގަންޖެހިދާނެކަމަށްވެސް އެޗްޕީއޭއިން ބުނެފައިވެއެވެ.

އެމްޕޮކްސްއަކީ ކޮވިޑުހާ އަވަހަށް ފެތުރޭ ބައްޔެއް ނޫންކަމަށާއި، މި ބަލި ފެތުރެނީ ބަލިޖެހިފައިވާ މީހަކާ ނުވަތަ ޖަނަވާރަކާ ގާތުން އުޅުމުން ނުވަތަ ބަލިޖެހިފައިވާ މީހެއްގެ ގައިގައި ހުންނަ ދިޔަ އެތެރެވުމުންކަމަށް އެޗްޕީއޭއިން މަޢުލޫމާތު ދީފައިވެއެވެ.

މި ބައްޔަށް އެންމެ ރިސްކު ބޮޑީ މާބަނޑު އަންހެނުންނާއި، ކުޑަކުދިންނާއި، ދިފާއީ ނިޒާމު ބަލިކަށި މީހުންނާއި، ހަމުގެ ބަލި ހުންނަ މީހުންނާއި އަދި ދިގު މުއްދަތަކަށް ބައްޔަކަށް ފަރުވާ ހޯދާ މީހުންކަމަށްވެސް އެ އިދާރާއިން ހާމަކޮށްފައިވެއެވެ.

ސިއްހީ ވަޒީރު އަބްދުﷲ ޚަލީލުގެ އިރުޝާދުގެ ދަށުން މި ބައްޔަށް ތައްޔާރުވުމުގެ މަސައްކަތް ކުރިއަށްދާކަމަށް އެޗްޕީއޭއިން ފާހަގަކޮށްފައިވެއެވެ.

އެމްޕޮކްސް އެޗްޕީއޭ