ތައިލެންޑުގެ އައު ބޮޑުވަޒީރަށް ރައީސުލްޖުމްހޫރިއްޔާ މަރުޙަބާ ވިދާޅުވެއްޖެ

ތައިލެންޑުގެ އައު ބޮޑުވަޒީރުކަމަށް އިންތިޚާބުވެވަޑައިގެންނެވި ޕޭޓޮންގޓާން ޗިނަވާތުއަށް ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުޙަބާ ދަންނަވައިފިއެވެ.

ތައިލެންޑުގެ ތާރީޚުގައި މިހާތަނަށް އިންތިޚާބުކުރެވުނު އެންމެ ޒުވާން ބޮޑުވަޒީރަށް މަރުޙަބާ ދަންނަވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފާހަގަކުރެއްވީ، އެކަމަނާގެ ދައުރުގައި ތައިލެންޑަށް އުޖާލާ މުސްތަޤުބަލެއް ކުރިމަތިވާނެ ކަމުގެ ޔަޤީންކަމެވެ. މީގެއިތުރުން، ކުރިއަށް އޮތް ދުވަސްތަކުގައި ދެ ޤައުމުގެ ގުޅުން އިތުރަށް ބަދަހިކޮށް، ގުޅިގެން މަސައްކަތްކުރެއްވުމަށް އުންމީދުކުރައްވާ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ތައިލެންޑުގެ އައު ބޮޑުވަޒީރު ޕޭޓޮންގޓާން ޗިނަވާތު އިންތިޚާބުކުރެވިފައިވަނީ، ކުރީގެ ބޮޑުވަޒީރު ފިޔު ތައި ޕާޓީގެ ސެއްތާ ތަވީސިން ޤާނޫނުއަސާސީއާ ޚިލާފުވެފައިވާ ކަމަށް ކަނޑައަޅައި، އެ މަޤާމުން ވަކިކުރުމާ ގުޅިގެންނެވެ.

ޕޭޓޮންގޓާނަކީ ތައިލެންޑުގެ ބޮޑުވަޒީރުކަމުގެ މަޤާމަށް އިންތިޚާބުކުރެވުނު ދެވަނަ އަންހެން ބޭފުޅާއެވެ. އަދި މިހާތަނަށް އެ މަޤާމާ ހަވާލުވެވަޑައިގެންނެވި އެންމެ ޒުވާން ބޭފުޅާއެވެ. އޭނާއަކީ ޗިނަވާތު ޢާއިލާއިން ބޮޑުވަޒީރުކަމުގެ މަޤާމު އަދާކުރައްވާ ތިންވަނަ ބޭފުޅާއެވެ. އޭނާގެ ކުރިން އެ މަޤާމު ފުރުއްވާފައިވާ ބޭފުޅުންގެ ތެރޭގައި އޭނާގެ ބައްޕާފުޅު ތަކްސިނާއި ބޮޑުދައިތާފުޅު ޔިންގލަކް ޗިނަވާތު ހިމެނިވަޑައިގަންނަވައެވެ.

އައު ބޮޑުވަޒީރެއް އިންތިޚާބުކުރުމަށް ޤާނޫނު ހަދާ މަޖިލީހުގައި ނެގުނު ވޯޓުގައި ޕޭޓޮންގޓާނަށް 319 މެންބަރުންގެ ތާއީދު ލިބިވަޑައިގަތެވެ. މިއީ މަޖިލީހުގެ ތިންބައިކުޅަ ދެބައިގެ އަޣުލަބިއްޔަތެވެ.