ސުލްހައިގެ ވާހަކަތައް ކުރިއަށްދަނިކޮށް ފަލަސްތީނުގެ އެތައް ބަޔަކު ޝަހީދުކޮށްލައިފި

ޣައްޒާގެ މެދުތެރޭގެ އަވަށެއްކަމަށް އަޒް ޒަވައިދާ ސަރަހައްދުގައި، ގެދޮރު ގެއްލިފައިވާ ފަލަސްތީނުގެ ރައްޔިތުން ހިޔާވަހިކަން ހޯދަމުންދިޔަ ގުދަނަކަށް އިސްރާއީލުގެ އަސްކަރިއްޔާއިން ބޮން އަޅައި، ނުވަ ކުޑަކުދިންނާއެކު، އެއް އާއިލާއެއްގެ 15 މީހުން ޝަހީދުކޮށްލައިފިއެވެ.

ޣައްޒާގައި ހުންނަ ސިވިލް ޑިފެންސްގެ ތަރުޖަމާނު މަހްމޫދު ބަސާލް ހޮނިހިރު ދުވަހު ވިދާޅުވީ މި ހަމަލާގައި ޝަހީދުވި 15 މީހުންނަކީ އަލް އިޖްލާ އާއިލާގެ މީހުން ކަމަށާއި ޝަހީދުވި މީހުންގެ ތެރޭގައި ތިން އަންހެނުން ހިމެނޭ ކަމަށެވެ. މި ހަމަލާގައި ޝަހީދުވި މީހުންގެ ޖުމްލަ އަކީ 16 އެވެ.

ޣައްޒާގެ މެދުތެރޭގައި އޮންނަ ދީރް އަލް ބަލާހުއިން ރިޕޯޓްކުރަމުން، އަލްޖަޒީރާގެ ތާރިގު އަބޫ އަޒްޒޫމް ވިދާޅުވީ ނުސީރަތު ރެފިއުޖީ ކޭމްޕުގެ ދެކުނުން ތަންކޮޅެއް ދުރުގައި ހުންނަ ގުދަނަށް، އިސްރާއީލުން ތިން މިސައިލް ހަމަލާދީފައިވާ ކަމަށެވެ.

ހަމާސްގެ އޮފިޝަލް އުސާމާ ހަމްދާން ވިދާޅުވީ، ގަތަރުގައި ދެ ދުވަސް ވަންދެން ކުރިއަށް ގެންދިޔަ ހަނގުރާމަ ހުއްޓާލުމުގެ މަޝްވަރާތަކަށް ފަހު، އިސްރާއީލުގެ ފަރާތުން މަޝްވަރާގައި ބައިވެރިވި ފަރާތްތަކުން ހަނގުރާމަ ހުއްޓާލުމަށް ވަރަށް ބޮޑަށް އުއްމީދު ކުރާއިރު، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަކީ، ހަނގުރާމަ ހުއްޓާލުމަށާއި އަސީރުން ދޫކޮށްލުމުގެ އެއްބަސްވުމަށް އޮތް އެންމެ ބޮޑު ހުރަސް ކަމަށެވެ.

އިޒްރޭލުގައި ސަރުކާރާ ދެކޮޅަށް އެތައް ހާސް ބަޔަކު ތެލްއަވީވް އާއި އެހެނިހެން ސިޓީތަކުގެ މަގުތަކަށް ނުކުމެ، ނަތަންޔާހޫ ހަނގުރާމަ ހުއްޓާލުމުގެ އެއްބަސްވުން ގަބޫލުކުރުމަށް ގޮވާލާ މުޒާހަރާކޮށްފައިވެއެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި މިހާތަނަށް 40،074 މީހުން ޝަހީދުވެ، 92،537 މީހުން ވަނީ ޒަޚަމްވެފައެވެ.  މިދިޔަ އޮކްޓޯބަރު މަހުގެ ހަތް ވަނަ ދުވަހު ހަމާސް ޖަމާއަތުން ދިން ހަމަލާތަކުގައި އިޒްރޭލުގެ 1،139 މީހުން މަރުވެ، 200 އަށް ވުރެ ގިނަ މީހުން ވަނީ އަސީރުންގެ ގޮތުގައި ބަންދުކޮށްފަ އެވެ.