ލިވަރޕޫލްއަށް މޮޅެއް! ސަލާހް އިތުރު ރެކޯޑްއެއް މުގުރާލައިފި

ލިވަރޕޫލް އާއި އިޕްސްވިޗް ޓައުން ބައްދަލު ކުރި މެޗު 2-0 ގެ ނަތީޖާއަކުން ލިވަރޕޫލްއިން ކާމިޔާބުކޮށްފިއެވެ.

ފުރަތަމަ ހާފުގައި ގޯލެއް ނުފެނުނު ކަމުގައިވީނަމަވެސް ލިވަރޕޫލްގެ ފަރާތުން ފެނިގެންދިޔައީ މޮޅު ކުޅުމެކެވެ. މުޅި މެޗު ޑޮމިނޭޓްކޮށްގެން ލިވަރޕޫލްއިން ކުޅުނު އިރު އިދިކޮޅު ޓީމަށް ލިބުނީ މަދު ފުރުސަތު ތަކެކެވެ.

ދެވަނަ ހާފު ލިވަރޕޫލް އިން ފެށީ ވަރުގަދަކޮށެވެ. އެގޮތުން 60 ވަނަ މިނެޓުގައި ޖޯޓާ އަށް ލިބުނު ފުރުސަތުގެ ބޭނުންކޮށް ގޯލު ކާމިޔާބުކޮށްދިނެވެ. އަދި ގިނަ އިތުރަކެއް ނުވެ ސަލާހް ލިވަރޕޫލްއަށް ގޯލު ޖަހައި ނަތީޖާ ފުޅާކޮށްދިނެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ މިސްރުގެ ތަރި މުހައްމަދު ސަލާހްއެވެ.

މިއަދުގެ މެޗުގައި ކާމިޔާބުކޮށްދިން ގޯލާއިއެކު ސަލާހްވަނީ ފުރަތަމަ މެޗުގައި އެސިސްޓް ނުވަތަ ގޯލު ކާމިޔާބުކޮށްދިން ކުޅުންތެރިންގެ ރެކޯޑް މުގުރާލައި ލިސްޓުގެ 1 ވަނައަށް ޖެހިލައިފައެވެ. މިއީ ސަލާހް ލިވަރޕޫލްއަށް ކާމިޔާބުކޮށްދިން 212 ވަނަ ގޯލެވެ.