ލ. ގަމުން މަސްތުވާތަކެއްޗާއި ބަނގުރާއާއެކު ދެ ދިވެހިން ހައްޔަރުކޮށްފި

ލ.ގަން

ލ. ގަމުން މަސްތުވާތަކެއްޗާއި ބަނގުރާ ކަމަށް ޝައްކުކުރެވޭ ތަކެއްޗާއެކު ދެ ދިވެހިން ހައްޔަރުކޮށްފިއެވެ.

މި ދެ މީހުން ހައްޔަރުކޮށްފައިވަނީ އިއްޔެ، ފުލުހުންނަށް ލިބުނު އިންޓެލިޖެންސް މަޢުލޫމާތަކާ ގުޅިގެން ހިންގި އޮޕަރޭޝަނެއްގައެވެ.

ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނިގޮތުގައި، ލ. ގަމު ތުނޑީ އަވަށުގެ ގެއެއްގައި މަސްތުވާތަކެތި ގެންގުޅެ ވިޔަފާރިކުރާ ކަމަށާއި، ބަނގުރާ ކައްކައި އޭގެ ވިޔަފާރިކުރާ ކަމުގެ މަޢުލޫމާތު އިންޓެލިޖެންސަށް ލިބުމާއި ގުޅިގެން، ކޯޓު އަމުރެއްގެ ދަށުން ފުލުހުން ވަނީ އެ ގެ ބަލައި ފާސްކޮށްފައެވެ.

ގެ ބަލައި ފާސްކުރުމުގެ ތެރެއިން 24.42 ގްރާމްގެ ހެރޮއިން ކަމަށް ޝައްކުކުރެވޭ މަސްތުވާތަކެއްޗާއި، ބަނގުރާ ކަމަށް ޝައްކުކުރެވޭ ދެ ރުނބާއާއި ފަސް ލީޓަރުގެ ފުޅިއެއް، އަދި ބަނގުރާ ކައްކަން ބޭނުންކުރާ ކަމަށް ބެލެވޭ ސާމާނު ފެނުނު ކަމަށް ފުލުހުން ބުނެފައި ވެއެވެ.

މި މައްސަލައާ ގުޅިގެން ހައްޔަރުކޮށްފައިވާ ދެ މީހުންނަކީ 42 އަދި 57 އަހަރުގެ ދިވެހި ފިރިހެނުންނެވެ. މި މައްސަލަ އިތުރަށް ތަޙުޤީޤުކުރަމުންދާ ކަމަށް ވެސް ފުލުހުން ބުނެފައިވެއެވެ.

ފުލުހުން ފުލުހުން