ވައި މަޑުވާނެކަމަށް ލަފާކުރެވެނީ އަންގާރަދުވަހު: މެޓް އޮފީސް

މޫސުމާބެހޭ ޤައުމީ އިދާރާއިން މަޢުލޫމާތު ދެއްވާފައިވާ ގޮތުގައި، ދިވެހިރާއްޖޭގެ އެކި ސަރަޙައްދުތަކަށް މިހާރު ކުރިމަތިވެފައިވާ ގަދަ ވައިގެ ޙާލަތު އަންނަ އަންގާރަ ދުވަހުން ފެށިގެން ތަދުރީޖީކޮށް މަޑުޖެހޭނެކަމަށް ލަފާކުރެވެއެވެ.

އިދާރާއިން އިތުރަށް ފާހަގަކުރައްވާފައިވަނީ، ކުރިއަށް އޮތް 24 ގަޑިއިރުގެ ތެރޭގައި ރާއްޖޭގެ އެކި ސަރަޙައްދުތަކަށް ގުގުރުމާއެކު ވިއްސާރަވެރި މޫސުމެއް ތަޖުރިބާކުރެވޭނެ ކަމަށާއި، ބައެއް ރަށްރަށަށް ބޯކޮށް ވާރޭވެހުމުގެ ފުރުޞަތު އޮތްކަމަށެވެ.

މީގެއިތުރުން، ކުރިއަށް އޮތް 24 ގަޑިއިރުގެ ތެރޭގައި ރާއްޖޭގެ ހުރިހާ ސަރަޙައްދެއްގައިވެސް ވައިގެ ބާރުމިން އިތުރުވާނެކަމަށް ލަފާކުރެވެއެވެ. މިގޮތުން، ދެކުނުގެ އަތޮޅުތަކަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައި ޖެހޭނެ ކަމަށާއި، އުތުރާއި މެދުރާއްޖެތެރޭގައި ވައިގެ ބާރުމިން ގަޑިއަކު 18 މޭލާއި 28 މޭލާ ދެމެދުގައި ހުރުމަކީ އެކަށީގެންވާ ކަމެކެވެ. އަދި ވިލާގަނޑުގައި ވައިގެ ބާރުމިން ގަޑިއަކު 50 މޭލަށް އަރާފާނެކަމަށްވެސް އަންދާޒާކުރެވެއެވެ.

މޫސުމާބެހޭ ޤައުމީ އިދާރާއިން ވަނީ ގުގުރުމާއެކު ބޯކޮށް ވާރޭވެހި، ވިލާގަނޑުގައި 45 މޭލަށް ވައިގަދަވެދާނެކަމަށް ލަފާކޮށް ހުދު ސަމާލުކަމުގެ އިންޒާރެއް ނެރުއްވާފައެވެ. މި އިންޒާރު ދެއްވާފައިވަނީ މިއަދު ހެނދުނު 6:30 އިން 12:30 އަށް ލ. އަތޮޅުން ފެށިގެން އައްޑޫ ސިޓީއާ ހަމައަށެވެ.

މޫސުމާބެހޭ ޤައުމީ އިދާރާއިން ހއ. އަތޮޅުން ފެށިގެން ތ. އަތޮޅާ ހަމައަށް ރީނދޫ ސަމާލު ނެރެފައިވެއެވެ. މި ސަމާލު ދެމިއޮންނާނީ މިއަދު ހެނދުނު 8:00 އިން މެންދުރު 13:00 އާ ހަމައަށެވެ. މި މުއްދަތުގައި ބޯކޮށް ވާރޭވެހި، ގަޑިއަކު 25-30 މޭލުގެ ބާރުމިނުގައި ވައިޖެހުމާއެކު، ވިއްސާރަ ގަދަވުމުގެ ސަބަބުން ގަޑިއަކު 50 މޭލަށް ވައިގެ ބާރުމިން އިތުރުވެ، ކަނޑުތައް ގަދަވާނެ ކަމަށް ލަފާކުރެވެއެވެ.

މި ނުރައްކާތެރި މޫސުމާ ގުޅިގެން، ރާއްޖޭގެ އެކި ސަރަޙައްދުތަކަށް ކުރަމުންދާ ވިއްސާރައާއި ވައިގަދަވުމުގެ ސަބަބުން ލިބިދާނެ ގެއްލުންތަކަށް ރައްޔިތުން ސަމާލުވުމަށް މޫސުމާބެހޭ ޤައުމީ އިދާރާއިން ވަނީ އިލްތިމާސްކޮށްފައެވެ. އަދި ރާއްޖޭގެ ހުރިހާ ސަރަޙައްދެއްގެ ކަނޑުތައް ގަދަވާނެކަމަށް ލަފާކުރެވޭތީ، މޫސުމަށް ޚާއްޞަ ސަމާލުކަމެއް ދިނުމަށާއި، ކޮންމެހެން ނޫނީ ކަނޑު ދަތުރުފަތުރު ނުކުރުމަށް އާންމުންނަށް އިލްތިމާސްކޮށްފައިވެއެވެ.