ކުރީގެ ވިޔަފާރިވެރިޔާ އޯކޭ ޒާހިރު އަވަހާރަވެއްޖެ

މުހައްމަދު ޒާހިރު (އޯކޭ ޒާހިރު)

ރާއްޖޭގެ ނަންމަޝްހޫރު ވިޔަފާރިވެރިއެއް ކަމުގައިވާ މުހައްމަދު ޒާހިރު (އޯކޭ ޒާހިރު) 76 އަހަރުގެ އުމުރުގައި ރޭ އަވަހާރަވެއްޖެ އެވެ.

ޒާހިރު އަވަހާރަވީ ސްރީ ލަންކާގެ އާސަންދަ ހޮސްޕިޓަލުގެ ވެންޓިލޭޓަރުގައި ފަރުވާ ދެމުންދަނިކޮށެވެ.

ޒާހިރަކީ ރާއްޖޭގެ ވިޔަފާރި ދާއިރާގައި އިސްކޮށް އުޅުއްވި ބޭފުޅެކެވެ. އޭނާ ވަނީ ދޮންނަ ކުނޑި އާއި އެއާ ފްރެޝްނާ ފަދަ ތަކެތި ރާއްޖޭގައި އުފައްދަވައިފައެވެ. މީގެ ތެރޭގައި ސާފް ލިކުއިޑް، ތިރުނަ ޕައުޑަރު، ރެހެންދި ޓެލްކަމް ޕައުޑަރު، ފަސޭހަ ލިކުއިޑް، އަދި ރީތިއަލީގެ ނަމުގައި އުއްބައްތި އުފެއްދެވުން ހިމެނެއެވެ. މީގެ އިތުރުން މަހާއި ހުއިފިލަނޑާގެ ބާވަތްތައް އެކްސްޕޯޓު ކުރުމުގެ މަސައްކަތް ވެސް ކުރައްވާފައިވެއެވެ.

ޒާހިރުގެ ވިޔަފާރީގެ ހިދުމަތަށް 1993 ވަނަ އަހަރު އިގްތިސާދީ މަސައްކަތް ކުރިއެރުވުމުގެ ދާއިރާއިން އާންމު ހިދުމަތުގެ އިނާމު ލިބިވަޑައިގެންފައިވެއެވެ. އަދި ވިޔަފާރިވެރިންގެ ޖަމިއްޔާގައި ވެސް އިސް ދައުރެއް އަދާކުރައްވާފައިވެއެވެ.

ސިޔާސީ ގޮތުން ވެސް ހަރަކާތްތެރިވެވަޑައިގެންނެވި ޒާހިރު، 2004 ވަނަ އަހަރުން ފެށިގެން ރާއްޖޭގައި ހިންގި މިނިވަން ބަހުސްތަކުގައި އިސްކޮށް ބައިވެރިވެވަޑައިގެންނެވިއެވެ. އަދި އެމްޑީޕީގެ ލ. ފޮނަދޫ ދާއިރާގެ ރައީސްކަން ވެސް ކުރައްވާފައިވެއެވެ.

އަވަހާރަވުން އޯކޭ ޒާހިރު