ލޭނު މަސްވެރިކަމާ ދެކޮޅަށް ކުރީގެ ރައީސް ނަޝީދު ކަންބޮޑުވުން ފާޅުކުރައްވައިފި
ކުރީގެ ރައީސް މުޙައްމަދު ނަޝީދު
ރާއްޖޭގައި ލޭނުގެ މަސްވެރިކަން ކުރުމުގެ ހުއްދަ ދިނުމާ ދެކޮޅަށް ކުރީގެ ރައީސް މުހައްމަދު ނަޝީދު ކަންބޮޑުވުން ފާޅުކުރައްވައިފި އެވެ.
އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވެފައިވަނީ ލޭނުގެ މަސްވެރިކަމުގެ ތެރޭގައި މަޑި އާއި ކޯމަހާއި މިޔަރު އަދި ކަނޑުމަތީ ދޫނިތައް ގިނަ އަދަދަކަށް ހިފޭ ކަމަށާއި، މީގެ ސަބަބުން ރާއްޖޭގެ ޓޫރިޒަމާއި ދޮށީގެ މަސްވެރިކަމުން އުފައްދާފައިވާ ޓޫނާ ބްރޭންޑަށް ގެއްލުންވާނެ ކަމަށެވެ.
ކުރީގެ ސަރުކާރުން ލޭނު މަސްވެރިކަން ކުރަން ލައިސަންސް ދޫކޮށްފައިވާ ބޯޓްތަކުގެ ލައިސަންސް އާކޮށްދިނުން ހުއްޓާލާފައިވެއެވެ. އޭރު ފިޝަރީޒް މިނިސްޓްރީން ހާމަކުރި ގޮތުގައި އެކަން ކުރަން ޖެހުނީ ގަވައިދާ ހިލާފު އަމަލުތައް ގިނަވެ ޔޫރަޕިއަން ޔުނިއަން (އީޔޫ) އިން އިންޒާރު ދިނުމުންނެވެ.
ނަމަވެސް މިހާރުގެ ސަރުކާރުން ވަނީ ލޭނު މަސްވެރިކަން ކުރުމާ ބެހޭ އައު ގަވާއިދެއްގެ ޑްރާފްޓް އެކުލަވާލައި، އާންމުންގެ ހިޔާލަށް ހުޅުވާލައިފައެވެ. ފިޝަރީޒް މިނިސްޓްރީން ބުނެފައިވަނީ މިފަހަރު ލޭނު މަސްވެރިކަމަށް ހުޅުވާލާނީ ކުރީގެ ތަޖުރިބާތަކަށް ބަލައި، ހާއްސަ މާއްދާތަކެއް ހިމަނައިގެން ކަމަށެވެ.
ކޮމެންޓް