ބޯންމަތް އިން ރެކޯޑު އަގެއްގައި ކުޅުންތެރިއެއް ގަނެފި

ބޯންމަތް އިން ބްރެޒިލްގެ ޤައުމީ ޓީމުގެ ސްޓްރައިކަރ އެވަނިލްސަންއާއެކު 40.2 މިލިއަން ޕައުންޑުގެ އެއްބަސްވުމެއްގައި ސޮއިކޮށްފިއެވެ. މިއީ ކުލަބުގެ ތާރީޚުގައި އެންމެ މަތީ އަގެއްގައި ކުޅުންތެރިއަކު ގެނައުމަށް ކުރެވުނު އިންވެސްޓްމަންޓެވެ.

24 އަހަރުގެ އެވަނިލްސަންވަނީ ވޭތުވެދިޔަ ހަތަރު އަހަރު ޕޯޗުގީޒް ކުލަބު އެފް.ސީ ޕޯޓޯއަށް ކުޅެ، 154 މެޗުގައި 60 ލަނޑު ޖަހާފައެވެ. މި އެއްބަސްވުމުގެ ދަށުން، ބޯންމަތު އެފް.ސީ އިން އިބްތިދާއީ ގޮތުން 31.7 މިލިއަން ޕައުންޑު ދައްކަންޖެހޭނެއެވެ. އަދި ވަކި ޝަރުތުތަކެއް ފުރިހަމަވުމުން އިތުރު 8.5 މިލިއަން ޕައުންޑު ދެއްކުމަށް ހަމަޖެހިފައިވެއެވެ.

ބޯންމަތުގެ ޗީފް އެގްޒެކެޓިވް ނީލް ބްލޭކް ވިދާޅުވީ އެވަނިލްސަންއަކީ ވަރަށް ގިނަ ކުލަބުތަކުން ހޯދަން އުޅުނު ސްޓްރައިކަރެއް ކަމަށާއި، މިފަދަ ރެކޯޑު އަގެއްގައި އޭނާ ގެނައުމުން ކުލަބުގެ އަމާޒާއި ވިސްނުން ހާމަވެގެންދާ ކަމަށެވެ. އަދި ވޭތުވެދިޔަ ސީޒަންގައި 25 ލަނޑު ޖަހާފައިވާ އެވަނިލްސަންގެ ހުނަރާއި ތަޖުރިބާއިން ކުލަބުގެ އަމާޒުތައް ހާސިލުކުރުމަށް އެހީތެރިވެދޭނެ ކަމަށް އުންމީދުކުރައްވާ ކަމަށް ވެސް ވިދާޅުވިއެވެ.

އެވަނިލްސަންއަކީ ބްރެޒިލްގެ ޤައުމީ ޓީމަށް ދެ ފަހަރު ކުޅެފައިވާ ކުޅުންތެރިއެކެވެ. އަދި ކޯޕާ އެމެރިކާގައި ބްރެޒިލް ޓީމުގައި ހިމެނި، ކުއާޓަރ ފައިނަލްގައި އުރުގުއޭއާި ދެކޮޅަށް ކުޅުނު މެޗުގައި ބަދަލު ކުޅުންތެރިއެއްގެ ގޮތުގައި ބައިވެރިވިއެވެ.

އެވަނިލްސަން ބޯންމަތުގައި ލާނީ ނަންބަރު 9 ޖާޒީއެވެ. މި ޖާޒީ ހުސްވެފައިވަނީ ޑޮމިނިކް ސޮލާންކޭ 65 މިލިއަން ޕައުންޑަށް ޓޮޓެންހަމްއަށް ބަދަލުވުމާ ގުޅިގެންނެވެ.