ބާ ކައުންސިލުގެ ސެކްރެޓަރީ ޖެނެރަލްގެ މަޤާމަށް އަލުން އިޢުލާންކޮށްފި

ބާކައުންސިލްގެ ބައެއް އިސްވެރިން

ބާ ކައުންސިލުގެ ސެކްރެޓަރީ ޖެނެރަލް (އެސްޖީ)ގެ މަޤާމަށް ކުރިމަތިލުމުގެ ފުރުޞަތު އަނެއްކާވެސް ހުޅުވާލައިފިއެވެ.

މި މަޤާމަށް މީހަކު ހޯދުމަށް މި މަހުގެ 5 ވަނަ ދުވަހު ވެސް ބާ ކައުންސިލުން އިޢުލާންކޮށްފައިވީ ނަމަވެސް، އެކަށީގެންވާ ތަރުހީބެއް ނުލިބުމާ ގުޅިގެން އަލުން އިޢުލާންކުރަން ޖެހުނީކަމަށް އެ ކައުންސިލުން ބުނެފައިވެއެވެ.

އެއް އަހަރު ދުވަހުގެ މުއްދަތަށް އައްޔަންކުރާ މި މަޤާމަށް އަލުން އިޢުލާންކޮށްފައިވަނީ އިއްޔެއެވެ. މި އިޢުލާނުގެ މުއްދަތު ހަމަވާނީ މި މަހުގެ 26 ވާ ހޯމަ ދުވަހުގެ މެންދުރު 12:00 އަށެވެ. ކުރީގެ އިޢުލާނާ ގުޅިގެން ފޯމު ހުށަހެޅި ފަރާތްތަކުން އަލުން ފޯމު ހުށަހަޅާކަށް ނުޖެހޭނެ ކަމަށް ބާ ކައުންސިލުން ބުނެފައިވެއެވެ.

މި މަޤާމުގެ މުސާރައަކީ މަހަކު 40,500 ރުފިޔާއެވެ. މީގެ އިތުރުން މަސައްކަތާ ގުޅޭ އެހެނިހެން އެލަވަންސްތަކާއި، ރޯދަ މަހުގެ އެލަވަންސް އަދި ޕެންޝަން ސްކީމްގެ ދަށުން ލިބިދެވޭ ޕެންޝަން ވެސް ލިބޭނެއެވެ.

މި މަޤާމަށް ކުރިމަތިލާ ފަރާތްތަކުގައި ހުންނަންޖެހޭ ޝަރުޠުތަކުގެ ތެރޭގައި ޤާނޫނީ ދާއިރާއިން ފުރަތަމަ ޑިގްރީ ހާސިލުކޮށްފައިވުމާއެކު، ޤާނޫނީ ވަކީލެއްގެ ގޮތުގައި މަދުވެގެން 7 އަހަރުދުވަހު މަސައްކަތްކޮށްފައިވުން ހިމެނެއެވެ. އަދި ނަޒާހަތްތެރިކަމާމެދު ސުވާލު އުފެދޭފަދަ މައްސަލައެއް ކޯޓަކަށް ނުވަތަ ބާ ކައުންސިލަށް ސާބިތުވެފައިވާ މީހަކަށް ވެގެން ނުވާނެއެވެ. މީގެ އިތުރުން ޤާނޫނީ ގޮތުން ބަނގުރޫޓުވެފައިވާ ނުވަތަ ޖިނާއީ ކުށެއް ސާބިތުވެފައިވާ މީހަކަށް ވެސް ވެގެން ނުވާނެއެވެ.

ބާ ކައުންސިލް