ރިސޯޓު މުވައްޒަފުންނަށް ބޯހިޔާވަހިކަން ދައުރު ނިމެން ވާއިރަށް ފޯރުކޮއްދޭނަން: ވަޒީރު ފައިސަލް

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، ރިސޯޓު މުވައްޒަފުންނަށް ވެވަޑައިގެންނެވި ބޯހިޔާވަހިކަމުގެ ވަޢުދު، މި ދައުރު ނިމުމުގެ ކުރިން ފުއްދަވާނެކަމަށް ފަތުރުވެރިކަމާބެހޭ ވަޒީރު އިބްރާހިމް ފައިޞަލް ވިދާޅުވެއްޖެއެވެ.

ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމްގައި ވާހަކަފުޅު ދައްކަވަމުން، ވަޒީރު ފައިޞަލް ފާހަގަކުރެއްވި ގޮތުގައި، ރިސޯޓު މުވައްޒަފުންނަށް ރައީސުލްޖުމްހޫރިއްޔާ ވެވަޑައިގެންނެވި އެންމެ މުހިންމު އެއް ވަޢުދަކީ ބޯހިޔާވަހިކަމުގެ ވަޢުދެވެ. އަދި މި ދައުރު ނިމުމުގެ ކުރިން އެ ވަޢުދު ފުއްދަވާނެކަމަށް އެމަނިކުފާނު ވިދާޅުވިއެވެ. މީގެ އިތުރުން، އެކަމުގެ މަސައްކަތްތައް ކުރިއަށްދާކަމާއި، ރައީސުލްޖުމްހޫރިއްޔާ އަމިއްލަފުޅަށްވެސް އެކަން ބައްލަވަމުން ގެންދަވާކަމަށް ވަޒީރު ފާހަގަކުރެއްވިއެވެ.

"ރިސޯޓު މުވައްޒަފުންނަށް އަޅުގަނޑު ޔަޤީންކަން އަރުވަން ބޭނުންވަނީ، ތިޔަ ބޭފުޅުންނަށް ރައީސް ވެވަޑައިގެންނެވި އެންމެ މުހިންމު ވަޢުދަކީ ބޯހިޔާވަހިކަމުގެ ވަޢުދުކަމަށެވެ. އެމަނިކުފާނު އެކަމަށްޓަކައި ގަދައަޅައި މަސައްކަތްކުރައްވަމުން ގެންދަވައެވެ. އިރާދަކުރެއްވިއްޔާ، ރައީސް ޑރ. މުޙައްމަދު މުއިއްޒުގެ މި ދައުރު ނިމޭއިރު، ރިސޯޓުތަކުގެ މުވައްޒަފުންނަށާއި މަސައްކަތްތެރިންނަށް ބޯހިޔާވަހިކަމުގެ ދާއިރާއިން ވެވަޑައިގެންނެވި ވަޢުދު ފުއްދަވާނެއެވެ. އަޅުގަނޑުވެސް އެކަން ވަރަށް ގާތުން ބަލައި، މޮނިޓަރކުރަމުން ގެންދަމެވެ. އަދި އެކަމުގެ މަސައްކަތް ކުރިއަށްދާކަން ކަށަވަރުވެއެވެ." ވަޒީރު ފައިޞަލް ވިދާޅުވިއެވެ.

ފަތުރުވެރިކަމާބެހޭ ވަޒީރު އިބްރާހިމް ފައިޞަލް ވިދާޅުވެފައިވަނީ، ފަތުރުވެރިކަމުގެ ދާއިރާގައި ދިގު މުއްދަތަކަށް ޚިދުމަތްކޮށްފައިވާ ގިނަ ފަރާތްތަކެއް ތިބި ނަމަވެސް، މިހާތަނަށް އެ ފަރާތްތަކުގެ ޙައްޤުތައް ރައްކާތެރިކުރުމަށް އެކަށީގެންވާ މަސައްކަތްތަކެއް ކުރެވިފައިނުވާ ކަމަށެވެ. އަދި ވަޒީރު އިތުރަށް ފާހަގަކުރެއްވި ގޮތުގައި، ރިސޯޓު މުވައްޒަފުންނަށް ބޯހިޔާވަހިކަން ފޯރުކޮށްދިނުމަށް ހަމަޖެހިފައިވަނީ، މިހާރު ކުރިއަށްގެންދެވޭ ހައުސިންގ މަޝްރޫޢުގެ ތެރެއިން ކަމުގައެވެ.