ހޮނިހިރު ދުވަހުން ފެށިގެން ވާރޭވެހުން މަޑުޖެހޭނެ ކަމަށް ލަފާކުރެވެއެވެ.
މޫސުމާބެހޭ ޤައުމީ އިދާރާއިން މަޢުލޫމާތު ދެއްވާފައިވާ ގޮތުގައި، ކުރިއަށް އޮތް 48 ގަޑިއިރުގެ ތެރޭގައިވެސް ދިވެހިރާއްޖޭގެ މޫސުން ގޯސްކޮށް ދެމިހުންނާނެއެވެ.
މި އިދާރާގެ މީޓިއޮރޮލޮޖިސްޓް އަބްދުﷲ ހާފިޒް، ޕީއެސްއެމް ނިއުސްއަށް ދެއްވި މަޢުލޫމާތުގައި ވިދާޅުވި ގޮތުގައި، ކުރިއަށް އޮތް 48 ގަޑިއިރުގެ ތެރޭގައި ރާއްޖޭގެ މޫސުން ގޯސްކޮށް ހުރުމަށްފަހު، ހޮނިހިރު ދުވަހުން ފެށިގެން ވާރޭވެހުން މަޑުޖެހޭނެ ކަމަށް ލަފާކުރެވެއެވެ.
"ވާރޭވެހުން މުޅިން ހުއްޓިދާނެ ކަމަކަށް ނުބެލެވޭ ނަމަވެސް، ފެންބޮޑުވާ މިންވަރަށް ވާރޭވެހުން މަދުވާނެ ކަމަށް ލަފާކުރެވޭ," ހާފިޒް ވިދާޅުވިއެވެ.
އިތުރަށް ހާފިޒް ވިދާޅުވި ގޮތުގައި، މިހާރު ވާރޭވެހޭ މިންވަރު މަދުވެފައިވީ ނަމަވެސް، ރަށްތަކަށް ވައިޖެހޭ މިންވަރު އިތުރުވެފައިވެއެވެ. އަދި ހޯމަ ދުވަހުގެ ފަހުން މެދުރާއްޖެތެރެއާއި އުތުރުގެ އަތޮޅުތަކުގައި ވައިގެ ބާރު މަޑުޖެހޭނެ ކަމަށާއި، ދެކުނުގެ އަތޮޅުތަކަށް މިހާރު ޖަހަމުންދާ ގަދަ ވައި އާދީއްތަ ދުވަހުގެ ފަހުން މަޑުޖެހޭނެ ކަމަށް ލަފާކުރެވެއެވެ.
ވައިޖެހޭނެ މިންވަރާ ގުޅޭގޮތުން ހާފިޒް ވިދާޅުވި ގޮތުގައި، މެދުރާއްޖެތެރެއާއި އުތުރުގެ އަތޮޅުތަކަށް ގަޑިއަކު 18 މޭލާއި 28 މޭލުގެ ބާރުމިނުގައި ވައިޖެހޭނެ ކަމަށާއި، ދެކުނުގެ އަތޮޅުތަކަށް ގަޑިއަކު 15 މޭލާއި 25 މޭލުގެ ބާރުމިނުގައި ވައިޖެހޭނެ ކަމަށް ލަފާކުރެވެއެވެ.
މޫސުމާބެހޭ ޤައުމީ އިދާރާއިން ވަނީ މިރޭ 8:00 އާ ހަމައަށް ހއ. އަތޮޅުން ތ. އަތޮޅާ ހަމައަށް ރީނދޫ ސަމާލުކަމުގެ ނިޝާން ނެރެފައެވެ. ކުރިއަށް އޮތް ދުވަސްތަކުގައި ވައިގަވާނެތީ މޫސުމާ ބެހޭ ޤައުމީ އިދާރާއިން ވަނީ ކަނޑުދަތުރު ކުރާ ފަރާތްތަކުން މޫސުމަށް ސަމާލުވުމަށް އިލްތިމާސް ކުރައްވާފައެވެ.
ކޮމެންޓް