ތައިލެންޑުގެ ބޮޑުވަޒީރުކަމަށް ކުރީގެ ބޮޑުވަޒީރުގެ ޒުވާން ދަރިކަނބަލުން

ތައިލެންޑުގެ ޕާލިމަންޓުން މިއަދު އެ ޤައުމުގެ އައު ބޮޑުވަޒީރުގެ ގޮތުގައި އިންތިޚާބުކޮށްފައިވަނީ ކުރީގެ ބޮޑުވަޒީރު ތަކްސިން ޝިނަވަޓްރާގެ ދަރިކަނބަލުން، ޕައޭޓޮންޓާން ޝިނަވަޓްރާއެވެ.

އުމުރުން 37 އަހަރުގެ ބިލިއަނަރު ތަކްސިންގެ ދަރިކަނބަލުން ޕައޭޓޮންޓާންއަކީ ތައިލެންޑުގެ ތާރީޚުގައި އެންމެ ޒުވާން ބޮޑުވަޒީރެވެ. އަދި އޭނާއަކީ އެ ޤައުމުގެ ދެވަނަ އަންހެން ބޮޑުވަޒީރެވެ. ފުރަތަމަ އަންހެން ބޮޑުވަޒީރަކީ ޕައޭޓޮންޓާންގެ ބޮޑުދައިތަ، ޔިންގްލަކް ޝިނަވަޓްރާއެވެ.

ޕައޭޓޮންޓާން ބޮޑުވަޒީރުކަމަށް އިންތިޚާބުކޮށްފައިވަނީ ތައިލެންޑުގެ ސިޔާސީ މަޝްރަޙު ހަލަބޮލިވެފައިވާ ދަނޑިވަޅެއްގައެވެ. އެއީ ޝަރުޢީ ކޯޓުތަކުން ނެރުނު ދެ ޙުކުމަކާ ގުޅިގެންނެވެ. އޭނާ ބޮޑުވަޒީރުކަމަށް އިންތިޚާބުކުރެވުނީ މީގެ ދެ ދުވަސް ކުރިން ދުސްތޫރީ ކޯޓުން ނެރުނު ޙުކުމެއްގައި ކުރީގެ ބޮޑުވަޒީރު ސްރެތާ ތަވިސިން މަޤާމުން ވަކިކުރުމާ ގުޅިގެންނެވެ.

ޕައޭޓޮންޓާންއަކީވެސް، ބޮޑުވަޒީރުގެ ސުލޫކީ މިންގަނޑުތަކާއި ގަވާއިދާ ޚިލާފުވި ކަމަށް ކަނޑައަޅައި މަޤާމުން ވަކިކުރެވުނު ސްރެތާގެ ޕީއު ތައި ޕާޓީގެ މެންބަރެކެވެ. މިއީ މިދިޔަ އަހަރުގެ އާންމު އިންތިޚާބުގައި ދެވަނައަށް ދިޔަ ޕާޓީއެވެ. މި ޕާޓީއަށް ޕާލިމަންޓުގެ އަޣުލަބިއްޔަތު ލިބިފައިވަނީ އެހެން ޕާޓީތަކަކާ އެކު އުފައްދާފައިވާ ކޯލިޝަނަކުންނެވެ.

ހައުސް އޮފް ރެޕްރެޒެންޓޭޓިވްސްގެ ރައީސް ވަން މުހައްމަދު ނޫރު މާތާ ވިދާޅުވި ގޮތުގައި ޕައޭޓޮންޓާން ބޮޑުވަޒީރުކަމަށް އިންތިޚާބުކުރުމަށް ޕާލިމަންޓުގެ 745 މެންބަރުންގެ ތެރެއިން 319 މެންބަރުން ވޯޓު ދެއްވާފައިވެއެވެ.

ޕައޭޓޮންޓާން ވިދާޅުވީ މިއީ އެމަނިކުފާނަށް ލިބިވަޑައިގެންނެވި ނުހަނު ބޮޑު ޝަރަފަކާއި އުފަލެއް ކަމުގައެވެ.

"ރައްޔިތުންގެ އިތުބާރު ހޯދުމަށް އަޅުގަނޑަށް ވަރަށް ބޮޑު އުންމީދެއް އެބައޮތް. އަދި ހަމައެހެންމެ، ތައިލެންޑުގެ އެންމެހައި ރައްޔިތުން ބާރުވެރިކުރުވައި، ފުދުންތެރި ބަޔަކަށް ހެދުމުގެ އުންމީދު ވެސް އެބައޮތް،" އެމަނިކުފާނު ވިދާޅުވިއެވެ.

އުމުރުފުޅުން 62 އަހަރުގެ ސްރެތާގެ ވެރިކަމަށް އަހަރެއްވެސް ނުވަނީސް، އެމަނިކުފާނު މަޤާމުން ވަކިކުރެވުނެވެ. މިއީ ފާއިތުވި 16 އަހަރުގެ ތެރޭގައި ދުސްތޫރީ ކޯޓުން މަޤާމުން ދުރުކުރެވުނު ތިންވަނަ ބޮޑުވަޒީރެވެ. އެމަނިކުފާނުގެ މަޤާމު ގެއްލިފައިވާ ކަމަށް ހުކުމްކުރެވުނީ، ޖިނާއީ ކުށެއް ސާބިތުވެ ޖަލު ހުކުމެއް ތަންފީޒުކުރެވިފައިވާ ޤާނޫނީ ވަކީލެއް ކެބިނެޓުގައި ހިމެނުމުގެ މައްސަލައިގައެވެ.

ތައިލެންޑުގެ ސިޔާސީ މައްސަލަތައް ބޮޑުވެފައިވާ މި ދަނޑިވަޅުގައި، އެ ޤައުމުގެ އިޤްތިޞާދީ ގޮންޖެހުންތައްވެސް ވަނީ އިންތިހާއަށް ބޮޑުވެފައެވެ. މިހެންކަމުން، އައު ބޮޑުވަޒީރަށް ކުރިމަތިވާނެ ގޮންޖެހުންތައް ވަރަށް ބޮޑުވާނެ ކަމަށް ލަފާކުރެވެއެވެ.