މޯލްޑިވިއަނުން އިތުރު 3 އޭޓީއާރު ބޯޓު ގެންނަނީ

ޤައުމީ އެއަރލައިން މޯލްޑިވިއަންގެ ވައިގެ އުޅަނދުފަހަރުގެ ފްލީޓު ޒަމާނީކުރުމުގެ މަސައްކަތުގެ ތެރެއިން، އޭޓީއާރު ބްރޭންޑުގެ އިތުރު 3 މަތިންދާބޯޓު ހޯދުމަށް ނިންމާފައިވެއެވެ.

މޯލްޑިވިއަން ހިންގާ އައިލެންޑް އޭވިއޭޝަނުން ވަނީ އޭޓީއާރު 42-600 މޮޑެލްގެ 3 މަތިންދާބޯޓު 15 އަހަރުގެ މުއްދަތަށް ކުއްޔަށް ހިފުމަށް ޝައުޤުވެރިކަން ފާޅުކޮށް، އިޢުލާނެއް ކޮށްފައެވެ. މި ބޯޓުތައް ފޯރުކޮށްދިނުމަށް ވަނީ ވަކި ތާވަލެއް ކަނޑައަޅާފައެވެ. އެގޮތުން:

1. ފުރަތަމަ ބޯޓު: 2023 ވަނަ އަހަރުގެ ޑިސެންބަރު މަހު
2. ދެވަނަ ބޯޓު: 2024 ވަނަ އަހަރުގެ އޮގަސްޓު މަހު
3. ތިންވަނަ ބޯޓު: 2026 ވަނަ އަހަރުގެ އޮކްޓޯބަރު މަހު

މި ބޯޓުތައް ފޯރުކޮށްދިނުމަށް ޝައުޤުވެރިވާ ފަރާތްތަކުން ޕްރޮޕޯސަލް ހުށަހެޅުމުގެ ސުންގަޑިއަކީ މި މަހުގެ 29 ވަނަ ދުވަހެވެ.

ފާހަގަކޮށްލެވޭ ކަމަކީ، މި އަހަރުގެ މެއި މަހުގައިވެސް މޯލްޑިވިއަންގެ ފްލީޓަށް އިތުރު އޭޓީއާރު ބޯޓެއް އިތުރުކުރެވިފައިވާކަމެވެ. މި ބޯޓު ރާއްޖެއަށް ގެނައުން ފާހަގަކުރުމަށް ބޭއްވުނު ރަސްމިއްޔާތުގައި، އައިލެންޑް އޭވިއޭޝަންގެ މެނޭޖިންގ ޑިރެކްޓަރ އިބްރާހިމް އިޔާސް ވަނީ އޭޓީއާރު މާކާގެ ބޯޓުތަކާއެކު ކުންފުނީގެ އޮޕަރޭޝަންތަކަށް އަންނަމުންދާ ކުރިއެރުންތައް ފާހަގަކުރައްވާފައެވެ. އަދި މިހާރުވެސް އިތުރު 3 އޭޓީއާރު މަތިންދާބޯޓަށް އޯޑަރު ދެވިފައިވާކަމަށާއި، އޭގެ ތެރެއިން 2 ބޯޓު 2023 ވަނަ އަހަރުގެ ޑިސެންބަރު މަހު ނުވަތަ 2024 ވަނަ އަހަރުގެ ކުރީކޮޅު ލިބޭނެ ކަމަށާއި، ތިންވަނަ ބޯޓު 2024 ވަނަ އަހަރުގެ ފުރަތަމަ ކުއާޓަރުގައި ލިބޭނެ ކަމަށް އިޔާސް ވިދާޅުވެފައިވެއެވެ.

މޯލްޑިވިއަންގެ ފްލީޓުގައި މިވަގުތު 25 މަތިންދާބޯޓު އޮޕަރޭޓުކުރަމުންދެއެވެ. މީގެ ތެރޭގައި އެއަރބަސް 320 A މަރުކާގެ މަތިންދާބޯޓަކާއި އޭޓީއާރު މަރުކާގެ 4 މަތިންދާބޯޓާއި، ޑޭޝް 8 މަރުކާގެ 9 މަތިންދާބޯޓާއި، އަދި ޑޭޝް 6 މަރުކާގެ ޓްވިންއޮޓާރ 11 މަތިންދާބޯޓު ހިމެނެއެވެ.