މޭން ސިޓީއިން މުބާމާ ސޮއިކުރުމަށް މަސައްކަތް ފަށައިފި

ސްޓްރައިކަރ ދިވިން މުބާމާ

މެންޗެސްޓަރ ސިޓީން، ކުރިން ވެސްޓް ހޭމްގައި ކުޅުނު ހުނަރުވެރި ސްޓްރައިކަރ ދިވިން މުބާމާ ސޮއިކުރުމަށް މަޝްވަރާތައް ކުރިއަށް ގެންދަމުންދާ ކަމަށް މަޢުލޫމާތު ލިބިފައިވެއެވެ.

19 އަހަރުގެ މި ޒުވާން ކުޅުންތެރިޔާގެ ކޮންޓްރެކްޓް ވެސްޓް ހޭމާއެކު މިދިޔަ ޖޫން މަހު ހަމަވެފައިވީ ނަމަވެސް، އޭނާ ތަމްރީނުކުރުމަށް ކުރި އިންވެސްޓްމަންޓަށް ބަދަލު ދޭންޖެހޭނެ ކަމަށް ވެސްޓް ހޭމުން ބުނެފައިވެއެވެ. އެހެންނަމަވެސް، މި ބަދަލުގެ އަދަދާ މެދު އަދި އެއްބަސްވުމަކަށް އާދެވިފައެއް ނުވެއެވެ. މި އަދަދާ މެދު އެއްބަސްވުމަކަށް ނާދެވިއްޖެ ނަމަ، ދެ ކްލަބުގެ މެދުގައި އާބިޓްރޭޝަނަކަށް ދާންޖެހޭނެއެވެ.

އިނގިރޭސި އަންޑަރ-20 ޤައުމީ ޓީމުގައި ކުޅޭ މުބާމާ ވަނީ ޔޫރަޕްގެ އެހެން ގިނަ ކްލަބުތަކުގެ ތެރެއިން މޭން ސިޓީއަށް ދިއުމަށް ނިންމާފައެވެ. އަދި އަމިއްލަ ޝަރުތުތަކާ މެދު އެއްބަސްވުމަކަށް އާދެވޭ ހިސާބަށް ވާސިލުވެފައިވާ ކަމަށް ލަފާކުރެވެއެވެ.

މުބާމާ މޭން ސިޓީއާ ގުޅުމުގެ ކުރިން މެޑިކަލް ޓެސްޓެއް ފުރިހަމަކުރަން ޖެހޭނެއެވެ. އޭގެ ފަހުން އޭނާ ފުރަތަމަ ފަށާނީ އަންޑަރ-21 ޓީމުގައި ކުޅެން ކަމަށް ވީނަމަވެސް، ފަސްޓް ޓީމުގައި ކުޅުމުގެ ފުރުސަތު ލިބޭނެ ކަމަށް ބެލެވެއެވެ. 10 އަހަރުގެ އުމުރުން ފެށިގެން ވެސްޓް ހޭމްގައި ކުޅެމުން އައި މުބާމާ ވަނީ އެ ކްލަބުގެ ފަސްޓް ޓީމުގައި 18 މެޗު ކުޅެ، އެއް ލަނޑު ޖަހާފައެވެ.

މެންޗެސްޓަރ ސިޓީ