މިއަދުވެސް ރާއްޖޭގެ ބޮޑު ބަޔަކަށް މޫސުން ގޯސްވާނެކަމަށް ލަފާކޮށް ރީނދޫ ސަމާލު ނެރެއްޖެ

މި ހަފުތާ ބަންދުގައިވެސް މޫސުން ގޯސްވާނެކަމަށް މެޓް އޮފީހުން ލަފާކުރޭ

މެޓިއޮރޮލޮޖިކަލް ސަރވިސްއިން މިއަދު ވެސް ރާއްޖޭގެ ބޮޑު ސަރަހައްދަކަށް މޫސުން ގޯސްވާނެކަމަށް ލަފާކޮށް ރީނދޫ ސަމާލު ނެރެފިއެވެ.

މިގޮތުން ހއ. އަތޮޅުން ފެށިގެން ތ. އަތޮޅާ ހަމައަށް ރީނދޫ ސަމާލު ނެރެފައިވަނީ މިއަދު މެންދުރުފަހު 14:00 އާ ހަމައަށެވެ.

މެޓް އޮފީހުން ނެރުނު ސަމާލުގައި ބުނެފައިވަނީ މި ސަރަހައްދުތަކުގައި ބޯކޮށް ވާރޭވެހި، ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައި ޖެހޭނެ ކަމަށެވެ. އަދި ވިއްސާރަ ގަދަވުމުގެ ސަބަބުން ވިލާގަނޑުގައި ގަޑިއަކު 50 މޭލުގެ ބާރުމިނުގައި ވައި ޖެހި، ކަނޑުތައް ވަރަށް ގަދަވާނެ ކަމަށް ލަފާކުރެވޭ ކަމަށްވެސް ބުނެފައިވެއެވެ.

މިދިޔަ އާދީއްތަ ދުވަހުން ފެށިގެން ރާއްޖޭގެ މޫސުން ވަނީ ގޯސްވެފައެވެ. މެޓް އޮފީހުން އޭރު ބުނެފައިވަނީ އާދިއްތަ ދުވަހުން ފެށިގެން ކުރިއަށް އޮތް ފަސް ދުވަހަށް ރާއްޖެ ސަރަހައްދުގައި ހުޅަނގު މޫސުމުގެ ބާރު ގަދަވާނެ ކަމަށެވެ. އޭގެ ފަހުން ކޮންމެ ދުވަހަކުވެސް މޫސުން ގޯސްވާނެ ކަމަށް ލަފާކޮށް ރީނދޫ، ހުދު އަދި އޮރެންޖް ސަމާލު ނެރެމުން ދެއެވެ.

މިހާރު ކުރަމުން އަންނަ ވިއްސާރައިގެ ސަބަބުން ބައެއް ރަށްތަކުގައި ފެންބޮޑުވުމުގެ ހާދިސާތައް ވަނީ ހިނގާފައެވެ. އަދި ބައެއް ރަށްތަކަށް ގެއްލުންވެފައިވާތީ، ކަމާ ބެހޭ އިދާރާތަކުން ވަނީ މޫސުމަށް ޚާއްސަ ސަމާލުކަމެއް ދީގެން، ކުރިއާލާ ގެއްލުންތަކުން ސަލާމަތްވުމަށް އިލްތިމާސް ކޮށްފައެވެ.

މޫސުން މޫސުން