ބިދޭސީންގެ ފީ ގަވާއިދުން ދައްކާ ކުންފުނިތަކުގެ ލިސްޓެއް އާންމުކޮށްފި

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ބިދޭސީންގެ ފީ ގަވާއިދުން ދައްކަމުން އަންނަ ކުންފުނިތަކުގެ ލިސްޓެއް އާންމުކޮށްފިއެވެ. މި ލިސްޓު އާންމުކުރެވުނީ، ކުރިން ޝާއިޢުކުރެވުނު ލިސްޓެއްގައި ހިމެނުނު ބައެއް މަޢުލޫމާތު އިޞްލާޙުކުރުމުގެ ގޮތުންނެވެ.

މިދިޔަ ޖުލައި މަހުގެ 24 ވަނަ ދުވަހު، ވަޒީފާ އަދާކުރާ ބިދޭސީންނާ ގުޅިގެން ދައްކަންޖެހޭ ފީތަކާއި ޖޫރިމަނާ އެއްލައްކަ ރުފިޔާއަށްވުރެ މައްޗަށް އަރާފައިވާ ފަރާތްތަކުގެ ލިސްޓެއް އެ ވުޒާރާއިން ވަނީ އާންމުކޮށްފައެވެ. އެހެންނަމަވެސް، އެ ލިސްޓުގައި ގަވާއިދުން ފީ ދައްކަމުންދާ ކުންފުނިތައްވެސް ހިމެނިފައިވާކަން ފާހަގަކުރެވުނެވެ.

ގަވާއިދުން ބިދޭސީންގެ ފީ ދައްކާ ކުންފުނިތައް

- އެލިއާ ކޮންސްޓްރަކްޝަން
- އަންގިރި ރެސޯޓްސް މެނޭޖްމަންޓް އެންޑް އޮޕަރޭޝަންސް
- ބްރެނިއާ މޯލްޑިވްސް
- ޗިކާނޯ އިންވެސްޓްމަންޓް
- އީސްޓް ކޯސްޓް އިންވެސްޓްމަންޓް
- ގޭޖް ޕްރައިވެޓް ލިމިޓެޑް
- ހެވީ ފޯސް
- ހޮރައިޒަން ފިޝަރީޒް
- އިންޓަރނޭޝަނަލް ބެވަރެޖެސް ކޮމްޕެނީ
- މަހޯގަނީ
- ޕެސްޓް އެކްސް މޯލްޑިވްސް
- ޕްރެސްޓައިން އައިލެންޑްސް އިންވެސްޓްމަންޓް (މޯލްޑިވްސް)
- ރެޑް ވޭވް
- ރެނާޓަސް ޕްރޮޖެކްޓްސް
- ސީގަލް ގްރޫޕް
- އެސްކޭ މޯލްޑިވްސް
- ދަ ހޯކްސް
- ޔުނިވަރސަލް އެންޓަޕްރައިސަސް
- ވިލާ ހަކަތަ
- ވިލާ ޝިޕިން އެންޑް ޓްރޭޑިން ކޮމްޕެނީ

އެ ލިސްޓުގައި ހިމެނޭ 20 ކުންފުންޏަކީ ގަވާއިދުން ފީ ދައްކަމުންދާ ކުންފުނިތަކެއްކަން ވުޒާރާއިން މިރޭ ނެރުނު ބަޔާނެއްގައި ހާމަކޮށްފައިވެއެވެ. މި ކުންފުނިތައް ކުރީގެ ލިސްޓުގައި ހިމެނިފައިވަނީ، އެވަގުތު ދައުލަތަށް ދައްކަންޖެހޭ ފީގެ އަދަދު އެއްލައްކަ ރުފިޔާއަށްވުރެ އިތުރުވެފައިވުމުގެ ސަބަބުންނެވެ.

ވުޒާރާއިން އިތުރަށް ބަޔާންކޮށްފައިވާ ގޮތުގައި، މި ކުންފުނިތަކަކީ އެކްސްޕެޓް ސިސްޓަމް މެދުވެރިކޮށް ފޯރުކޮށްދޭ ޚިދުމަތްތަކާ ގުޅިގެން ގަވާއިދުން ދައުލަތަށް ދައްކަންޖެހޭ ފީތައް ދައްކަމުންދާ ފަރާތްތަކެވެ. އަދި މިއަދާ ހަމައަށް، އެ ކުންފުނިތަކުން ދައުލަތަށް ދައްކަންޖެހޭކަމަށް ކަނޑައެޅިފައިވާ އަދަދަށް ފައިސާ ދައްކާފައިވާކަންވެސް ވުޒާރާގެ ބަޔާނުގައި ފާހަގަކޮށްފައިވެއެވެ.