މޯލްޑިވިއަންއަށް އޭޓީއާރު މަރުކާގެ ތިން މަތިންދާބޯޓު ހޯދަނީ

ގައުމީ އެއަރލައިން މޯލްޑިވިއަންއަށް އޭޓީއާރު މަރުކާގެ ތިން މަތިންދާބޯޓު ގަނެދޭނެ ފަރާތެއް ހޯދުމަށް އިޢުލާނުކޮށްފިއެވެ.

މޯލްޑިވިއަން ހިންގާ އައިލެންޑް އޭވިއޭޝަނުން (އައިއޭއެސް) މިއަދު ވަނީ މި މަތިންދާބޯޓުތައް ފައިނޭންސް ލީސް ކޮށްދިނުމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމަށް ހުޅުވާލާފައެވެ. އައިއޭއެސް އިން ބުނެފައިވަނީ މި ބޯޓުތަކަކީ މުޅިން އައު އޭޓީއާރު 600-42 މަރުކާގެ މަތިންދާބޯޓުތަކެއް ކަމަށާއި، މި ބޯޓުތައް ގަންނަނީ 15 އަހަރުގެ މުއްދަތުން ފައިސާ ދައްކާ ހަލާސްކުރާ ގޮތަށް ކަމަށެވެ.

މި ތިން ބޯޓު ގަތުމަށް އޭޓީއާރާއެކު އައިއޭއެސް އިން މިހާރު އެއްބަސްވުން ހަދާފައިވާ ކަމަށްވެސް އެ ކުންފުނިން ބުނެފައިވެއެވެ. މޯލްޑިވިއަންއަށް މި ބޯޓުތައް ބޭނުންވާ ތާރީޚުތައްވެސް އިޢުލާނުގައި ހިމަނާފައިވެއެވެ. އެގޮތުން އެއް ބޯޓު މި އަހަރުގެ ޑިސެމްބަރަށް، އަނެއް ބޯޓު މި މަހުގެ ތެރޭ، އަދި އެންމެ ފަހު ބޯޓު 2026 ގެ އޮކްޓޯބަރަށް ބޭނުންވާ ކަމަށް ބުނެފައިވެއެވެ.

މި ފުރުސަތު ހުޅުވާލާފައިވަނީ މަތިންދާބޯޓު ގެންގުޅޭ ފަރާތްތަކަށާއި ބޭންކުތަކަށް އަދި ބޯޓު ކުއްޔަށް ދޭ ކުންފުނިތަކަށާއި މާލީ ކުންފުނިތަކަށެވެ. މިހާރު މޯލްޑިވިއަންގެ ފްލީޓުގައި އޭޓީއާރު މަރުކާގެ ހަތަރު ބޯޓު އޮތް ކަމަށް އައިއޭއެސް އިން މަޢުލޫމާތު ދީފައިވެއެވެ.

މި ސަރުކާރު ވެރިކަމާއި ހަވާލުވުމަށް ފަހު މޯލްޑިވިއަންގައި ބޭނުންކުރާ މަތިންދާ ބޯޓްތައް އިތުރުކުރުމަށް ވަރަށް ބޮޑަށް މަސައްކަތް ކުރަމުން އަންނަކަން ފާހަގަކުރެވެއެވެ. އެގޮތުން ދުރު މަންޒިލްތަކަށް ދަތުރުތައް ފެށުމަށް ވައިޑް ބޮޑީ އެއާކްރާފްޓެއް ހޯދުމަށް ވެސް ވައިގެ އުޅަނދު ކުއްޔަށް ދޭ ބައިނަލްއަގުވާމީ ކުންފުނި ޓްރޫނޯޑްއާ އެކު ވެސް ދާދިފަހަކުން ވަނީ ސޮއިކޮށްފަ އެވެ.