އައިޖީއެމް ހޮސްޕިޓަލް ކައިރީގައި ހުރި ފާރެއް ވެއްޓި، ސައިކަލުތަކަށް ގެއްލުންވެއްޖެ

މިހާރު ކުރަމުންދާ ވިއްސާރާގައި މިރޭ މާލެއަށް ވައި ގަދަވެ އައިޖީއެމް ހޮސްޕިޓަލުގެ އިމަޖެންސީ ފަޅީގައި ހުންނަ ޕާކިން ޒޯނުގައި ހުރި ފާރެއް ވެއްޓި، އެތަނުގައި ޕާކު ކޮށްފައި ހުރި ސައިކަލުތަކަކަށް ގެއްލުން ވެއްޖެއެވެ.

ދިރާގު ހެޑް އޮފީހާއި ދިމާލަށް ހުންނަ މި ފާރު ވެއްޓުނުއިރު، ފާރުގައި ހުރީ ޓިނު ފެންސެއް ވެސް ޖަހާފައެވެ. ފާރުގެ ބޮޑު ބައެއް ވެއްޓި، އެތަނުގައި ޕާކު ކޮށްފައި ހުރި ސައިކަލުތަކުގެ މައްޗަށް ވަނީ ޖެހިފައެވެ. މީގެ ސަބަބުން ސައިކަލުތަކަށް ވަނީ ވަރަށް ބޮޑަށް ގެއްލުންވެފައެވެ.

މި ހާދިސާއާއި ގުޅިގެން ފުލުހުންގެ ބަހެއް އަދި ލިބިފައި ނުވާއިރު، ހާދިސާގައި ސައިކަލުތަކަށް ލިބުނު ގެއްލުންތަކުގެ ތަފްސީލެއް އަދި އެނގިފައެއް ނުވެއެވެ. އަދި ހާދިސާގައި މީހަކަށް އަނިޔާވި ކަމުގެ މަޢުލޫމާތެއް ވެސް ލިބިފައެއް ނުވެއެވެ.

މިހާރު ރާއްޖެއަށް ކުރަމުން މިދާ ވިއްސާރައިގައި މިއަދުވެސް ވަނީ ރާއްޖޭގެ ބޮޑު ބަޔަކަށް ރީދޫ ސަމާލު ނެރެފައެވެ. މިއަދު ވާރޭ ނުވެހުނު ނަމަވެސް ރާއްޖޭގެ ހުރިހާ ހިސާބަކަށްވެސް ވަރަށް ބާރަށް ވައިޖެހޭނެކަމަށް މެޓް އޮފީހުން ލަފާކޮށްފައި ވެއެވެ.