މަޝްހޫރު ފިލްމު ޑައިރެކްޓަރު މުހައްމަދު ހިލްމީ ޑައިރެކްޓުކުރާ ދިވެހި ފިލްމު "ލަމްހާ" މިމަހުގެ 29ގައި އޮލިމްޕަހުގައި އަޅުވަން ނިންމައިފި އެވެ.
ފިލްމުގެ ޓިކެޓު މިހާރު އޮލިމްޕަހުގެ ޓިކެޓު ކައުންޓަރުން ގަންނަން ލިބޭނެ އެވެ. އަދި 7885663 އަށް ގުޅައިގެން ވެސް ޓިކެޓް ގަނެވޭނެ އެވެ.
"ލަމްހާ" ފިލްމުގެ ޑައިރެކްޓަރު ހިލްމީއަކީ ދިވެހިންގެ މަގުބޫލުކަން ހޯދައިފައިވާ ޑައިރެކްޓަރެކެވެ. އޭނާ ވަނީ "އިހްސާސް" އާއި "ޗުއްޓީ" ފަދަ ފިލްމުތައް ނެރެފަ އެވެ.
މިމަހުގެ 29 ވަނަ ދުވަހު ހިލްމީ ނެރޭ "ލަމްހާ" ފިލްމަކީ 35 އަހަރުފަހުން އޭނާ ނެރޭ ފުރަތަމަ ފިލްމެވެ.
އެ ފިލްމަކީ މީގެ އަހަރުތަކެއް ކުރިން ލިޔެފައިވާ ސްކްރިޕްޓެއްގެ މައްޗަށް ހަދައިފައިވާ ފިލްމެކެވެ. އެހެންކަމުން އެ ފިލްމު ހެދުމުގެ ކުރިން މިޒަމާނަށް ފައްތަން ޖެހުނު ކަމަށް ހިލްމީ ވަނީ އެ ފިލްމުގެ ޓައިޓަލް ލޯންޗުކުރި ދުވަހު ބުނެފަ އެވެ.
"ލަމްހާ" ފިލްމަކީ މަންމައަކާއި ދަރިއެއްގެ ދެމެދުގައިވާ ހަނދާންތަކާއި ލޯބީގެ މައްޗަށް ހަދައިފައިވާ ފިލްމެކެވެ.
ފިލްމުގެ ލީޑް ރޯލުން ފެންނާނީ އައިޝާ އަލީ އެވެ. އިތުރު ރޯލުތަކުން ފެންނާނީ އހުމަދު ޝާރިފު އާއި ނުޒުހަތު ޝުއައިބު (ނުޒޫ)ގެ އިތުރުން އަހުމަދު އީސާ (އާނަންދު) އެވެ.
ކޮމެންޓް