ރާއްޖޭގެ ގިނަ ރަށްރަށުގެ މިސްކިތްތަކުގައި ދާއިމީ އިމާމުން ނެތުމުގެ ސަބަބުން ވަގުތީ އިމާމުން ތިބެން ޖެހުމާ އެކު، މި މައްސަލައަށް އަވަސް ހައްލެއް ހޯދުމުގެ މަސައްކަތް އިސްލާމިކް މިނިސްޓްރީން ފަށައިފި އެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވި ގޮތުގައި، މި މައްސަލަ ރަށްތަކުގައި ދިމާވެފައި ވަނީ މިސްކިތްތަކުގެ އަދަދު ގިނަވުމާއި އިމާމުންގެ ވަޒީފާ އަދާ ކުރެވޭ މިންވަރުގެ ފެންވަރު ހުރި މީހުން ބައެއް ރަށްތަކުގައި މަދުކަމުން ކަން ވަނީ ފާހަގަވެފަ އެވެ.
އަދި މި މައްސަލަ އަށް ހައްލު ހޯދުމަށް ޓަކައި އޯލެވެލް ނިންމާ ދަރިވަރުންގެ ތެރެއިން ދާއިރާއަށް ޝައުގުވެރިވާ ކުދިންނަށް އިތުރަށް ވަޒީފާގެ ފުރުސަތު ފަހި ކުރުމާއި، އިމާމުކަމުގެ ކޯހެއް ނުވަތަ އެއާ ގުޅުން ހުރި ކޯހެއް ނެތް ފަރާތް ތަކަށް، މިނިސްޓްރީން ކަނޑާއަޅާ މިންވަރުގެ މުގައްރަރެއް ކަނޑައަޅައި އާއްމުކޮށް އޭގެ ދަށުން ކޮންމެ އަހަރަކު އިމާމު ކަމާ ގުޅޭ އާއްމު އިމްތިހާނެއް ތައާރަފްކޮށް އިމާމްކަން ކުރުމުގެ ހުއްދައެއް ތައާރަފް ކުރުމަށް މިނިސްޓްރީން މަޝްވަރާ ކުރަމުން އަންނަ ކަމަށެވެ.
ރާއްޖޭގައި މީހުން ދިރިއުޅޭ ރަށްރަށުގައި 623 މިސްކިތް ހުރި އިރު، ދާއިމީ އިމާމުންގެ އަދަދަކީ 569 އެވެ. އަދި ދާއިމީ އިމާމުން ހަމަޖެހިފައިވާ މިސްކިތްތަކުގެ އަދަދަކީ 554 އެވެ.
މި ވަގުތު 69 މިސްކިތެއްގައި ދާއިމީ އިމާމުން ނެތް އިރު 15 މިސްކިތެއްގައި ދެ އިމާމުން އިމާމުކަން ކުރާ ގޮތަށް ހަމަޖެހިފައިވާކަން ފާހަގަ ކޮށްލެވެ އެވެ.
ކޮމެންޓް