ފަސް ވަނަ ކަރުނާޓަކާ އިންޓަނޭޝަނަލް ފިލްމު ފެސްޓިވަލްއިން އެވޯޑު ހާސިލްކޮށްފައިވާ ފަރާތްތަކަށް ހާއްސަކޮށްގެން ހާއްސަ އެވޯޑު ހަފުލާއެއް ބާއްވައިފި އެވެ.
މިދިޔަ ބުރާސްފަތި ދުވަހުގެ ރޭ ބޭއްވި އެ ހަފުލާއަކީ ކަރުނާޓަކާ އިންޓަނޭޝަނަލް ފިލްމު އެވޯޑްސްއިން އެވޯޑު ހާސިލްކޮށްފައިވާ ފަރާތްތަކަށް އެ އެވޯޑުތައް ހަވާލުކުރުމަށް ބޭއްވި ހަފުލާއެކެވެ.
މޯލްޑިވްސް ސޮސައިޓީ ފޯ ޕާފޯމިން އާޓްސް (އެމްއެސްޕީއޭ)އިން އިސްނަގައިގެން އެ ހަފުލާ ބާއްވައިފައިވަނީ އިންޑިއަން ކަލްޗަރަލް ސެންޓަރުގަ އެވެ.
އެ ހަފުލާގައި ދެ ވަނަ އެކްޓިން ވޯކްޝޮޕް އިއުލާނުކޮށް، ކަރުނާޓަކާ އިންޓަނޭޝަނަލް ފިލްމު އެވޯޑްސްއިން އެވޯޑު ހާސިލްކޮށްފައިވާ ފަރާތްތަކަށް އެ އެވޯޑުތައް ހަވާލުކޮށްފައިވެ އެވެ.
ފަސް ވަނަ ކަރުނާޓަކާ އިންޓަނޭޝަނަލް ފިލްމު ފެސްޓިވަލްގައި ރާއްޖޭގެ ދެ ފިލުމަކަށް އެވޯޑު ލިބިފައިވެ އެވެ.
އެގޮތުން ކިޑް ޕްރޮޑަކްޝަންއާ ސެޓާން ސްޓޫޑިއޯއިން އުފެއްދި ފިލްމު "ކަމަނަ"އަށް ވަނީ ތިން ކެޓަގަރީއަކުން އެވޯޑު ލިބިފަ އެވެ.
މީގެ އިތުރުން މުހައްމަދު އަލީ އަދި އައިޝަތު ފުއާދު ތައުފީގު ޑައިރެކްޓްކޮށްފައިވާ ޑާކްރެއިން އެންޓަޓެއިންމެންޓްގެ "ނޮވެމްބަރު" ފިލުމަށް ވެސް ވަނީ އެވޯޑު ލިބިފަ އެވެ. އެ ފިލްމަށް ލިބިފައިވަނީ އެންމެ މޮޅު ސިނަމޮޓޯގްރަފީ އެވޯޑެވެ. އެ އެވޯޑަކީ ޖޮއިންޓު އެވޯޑެކެވެ.
މި ފެސްޓިވަލްގައި އެންމެ މޮޅު ޑައިރެކްޓަރުގެ އެވޯޑު ހާސިލުކުރީ "ކަމަނަ" ގެ ޑައިރެކްޓަރު ހުސެން މުނައްވަރެވެ. މީގެ އިތުރުން، އެ ފިލްމުގެ ބަތަލާ މަރިޔަމް އައްޒަ އަށް އެންމެ މޮޅު ލީޑް އެކްޓްރެސްގެ އެވޯޑު ލިބިފައިވާއިރު، އެންމެ މޮޅު ލީޑް އެކްޓަރުގެ އެވޯޑު ހާސިލުކުރީ ފިލްމުގެ ބަތަލު ޔޫސުފް ޝަފީއު (ޔޫއްޕެ) އެވެ.
އިންޑިއާގެ ނަވާ ކަރުނާޓަކާ ފިލްމު އެކަޑަމީން އިންތިޒާމުކުރާ މި ފެސްޓިވަލަކީ ދުނިޔޭގެ އެކި ގައުމުތަކުގެ ފިލްމުތަކާއި ޑޮކިއުމެންޓްރީތަކަށް ފުރުސަތު ހުޅުވާލައިގެން ބާއްވާ ބައިނަލްއަގުވާމީ ހަރަކާތެކެވެ.
ކޮމެންޓް