ވޭތުވެދިޔަ ދުވަސްތަކުގައި ދިމާވި ގޮންޖެހުންތަކުން އަރައިގަނެވިއްޖެ: ރައީސް

މިސަރުކާރު ވެރިކަމާއި ހަވާލުވެގެން މިދިޔަ ދުވަސްތަކުގައި ބޮޑެތި ގޮންޖެހުންތަކެއް ކުރިމަތިވި ކަމަށާއި، އެހެންނަމަވެސް އެ ދިމާވި ގޮންޖެހުންތަކުން މިހާރު ވަނީ އަރައިގަނެވިފައި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ.

ރައީސް މިފަދައިން ވިދާޅުވީ އެމަނިކުފާނު މިހާރު ބ. އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅު ކުޑަރިކިލު ރައްޔިތުންނާއި ބައްދަލު ކުރައްވާ ދެއްކެވި ވާހަކަފުޅުގަ އެވެ. އަދި ވިދާޅުވީ މިސަރުކާރުގެ ދޮޅު އަހަރުގެ ތެރޭގައި މަޝްރޫއުތައް ހިންގައި، ރައްޔިތުންނަށްވެފައިވާ ވައުދުތައް ފުއްދުމުގައި ގޮންޖެހުންތައް ދިމާވި ކަމަށެވެ.

ރައީސް ވިދާޅުވީ ރިޔާސީ އިންތިހާބުގައި ވެވަޑައިގެންނެވި ވައުދުތައް ވަރަށް ރަނގަޅަށް ހަނދުމަފުޅު އެބަހުރި ކަމަށާއި، އެ ވައުދުތައް ފުއްދުމުގައި ސަރުކާރުން ސީރިއަސް ކަމާއެކު ދެމި އޮންނާނެ ކަމަށެވެ.

އެމަނިކުފާނު ވިދާޅުވީ ރަށްރަށުގައި ގިނަ މަޝްރޫއުތަކެއް ފަށައި، ހުއްޓިފައި ހުރިކަން އެނގިވަޑައިގަންނަވާ ކަމަށެވެ. އެހެންކަމުން އެފަދަ މަޝްރޫއުތައް ކުރިއަށް ގެންދެވޭނެ މަގުތައް މި ސަރުކާރުން ހޯދައި އެކަންކަން ނިންމާނެ ކަމަށެވެ.

މި އަހަރުގެ ޖެނުއަރީ މަހު ހއ. މާރަންދޫއަށް ވަޑައިގެން އެ ރަށު ރައްޔިތުންނާ ބައްދަލުކުރައްވައި ރައީސް ވިދާޅުވެފައިވަނީ ރައްޔިތުންގެ ގާތަށް އެ މަނިކުފާނާއި ވަޒީރުންގެ މަޖިލީހުގެ މެންބަރުން ވަޑައިގަތުމަކީ އެއްވެސް ހާލެއްގައި ބޭކާރު ވެގެންދާ ހަރަދެއް ނޫން ކަމަށެވެ.

ރައީސް ވިދާޅުވި ގޮތުގައި އެއާހިލާފަށް ބޭކާރު ވެގެންދާ ހަރަދަކީ ކަންކަން ނުކުރެވި ލަސްވެގެން ގޮސް ލިބޭ ގެއްލުމުގެ އަގު މާ ބޮޑެވެ.