މީޑިއާ ބިލުން އެއްވެސް ނޫސްވެރިއެއްގެ އަޑު ކަނޑުވައެއް ނުލާނެ: ސިނާން

ރައްޔިތުންގެ މަޖިލީހަށް މިހާރު ހުށަހަޅާފައިވާ މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލުގެ ސަބަބުން އެއްވެސް ނޫސްވެރިއެއްގެ އަޑު ކަނޑުވައެއް ނުލާނެ ކަމަށާ އެއީ އެހެން ޑިމޮކްރެސީތަކުގައި ލިބިދޭ ހައްގުތައް ދިވެހިންނަށް ވެސް ލިބިދިނުމަށް ހުށަހެޅޭ ބިލެއް ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު މުހައްމަދު ސިނާން ވިދާޅުވެއްޖެ އެވެ.

ޕީއެންސީއަށް ނިސްބަތްވާ މެމްބަރު ސިނާން ކުރެއްވި އެކްސް ޕޯސްޓެއްގައި ވިދާޅުވީ ނޫސްވެރިކަމުގެ ނަމުގައި ފަހަތުގައި ފިލައި ތިބޭ ސިޔާސީ އެކްޓިވިސްޓުން މަސައްކަތް ކުރަނީ މިނިވަން ކަމަކީ މީހުންނަށް ފުރައްސާރަކޮށް، އަބުރާއި އިއްޒަތަށް އުނިކަން ގެނެސް، އަދި ދޮގު ފެތުރުމުގެ ހައްގު ކަމުގައި ދައްކަން ކަމަށެވެ.

ޒިންމާދާރުކަމެއް ނެތް މިނިވަން ކަމަކީ މިނިވަންކަމެއް ނޫން ކަމަށާއި އެއީ ހަމަ ހަމަނުޖެހުންކަން ފާހަގަ ކުރައްވާ ސިނާން ވިދާޅުވީ އެ ކުރެވޭ ކަމަކީ އާންމު ރައްޔިތުންނާއި އާއިލާތައް ބުހުތާނު ދޮގު ހަދާ މީހުންގެ ކިބައިން ރައްކާތެރިކަން ނެތް ގޮތަށް ދޫކޮށްލެވެނީ ކަމަށެވެ.

ސިނާން ވިދާޅުވީ ދުނިޔޭގެ ޒިންމާދާރު ޑިމޮކްރެސީތަކުގައި ވެސް ދޮގު ހަބަރު ލިޔެގެން އާންމު ރައްޔިތުން ބަދުނާމުކުރާ ކުރުމުން ސަލާމަތްކޮށްދީ، ހަގީގަތް ހާމަ ކުރުވާ ހިމާޔަތް ކުރުމުގެ ގޮތުން މީޑިއާ ގާނޫނުތައް ތައާރަފުކޮށްފައިވާ ކަމަށެވެ.

"މީޑިއާ ބިލު ވެސް މި އުސޫލުގެ މަތިން އެކުލަވާލެވިފައިވާ އެއްޗެއް، މި ބިލު ފަރުމާ ކުރެވިފައިވަނީ އާންމުންގެ ގަދަރާއި ކަރާމާތް ހިމާޔަތް ކުރުމަށާއި، އާއިލާތައް ނުބައި ނުލަފާ ދޮގުތަކުން ސަލާމަތް ކުރުމަށާއި، އަދި ނޫސްވެރިކަމުގެ ހިދުމަތް ތެދުވެރިކަމާއި އިންސާފުވެރިކަމާއެކު ރައްޔިތުންނަށް ފޯރުކޮށްދިނުން ކަށަވަރުކުރުމަށް،" ސިނާން ވިދާޅުވި އެވެ.

ސިނާން ވިދާޅުވީ މިހާރު ހުށަހަޅާފައި އޮތް މީޑިއާ ބިލު ލަސްނުކޮށް ފާސް ކުރުމަކީ މުޖުތަމައު ހިމާޔަތް ކުރުމާއެކު ޑިމޮކްރަސީ ރައްކާތެރިކޮށް، އަދި ދިވެހި ރައްޔިތުންގެ މުސްތަގުބަލު ޔަގީން ކުރުމަށް ކޮންމެހެން މުހިންމު ކަމެއް ކަމަށެވެ.

މީޑިއާ ބިލް މަޖިލީހަށް ހުށަހެޅުއްވީ އަމިއްލަ މެންބަރެއްގެ ގޮތުގައި ހުންނެވި ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރު އެވެ.

މި ބިލު މަޖިލީހަށް ބަލައިގަނެ، ދިރާސާ ކުރަން މިހާރު ވަނީ މިނިވަން މުއައްސަސާތަކުގެ ކޮމިޓީއަށް ފޮނުވާފަ އެވެ.