ނިމިދިޔަ 5 އަހަރު ބޭރުގެ އެއްވެސް އިންވެސްޓްމަންޓެއް ގެނެވިފައެއް ނެތް - ޒަރީރު

ނިމިދިޔަ ރައީސް އިބްރާހިމް މުޙައްމަދު ސޯލިހުގެ ވެރިކަމުގައި ބޭރުގެ އެއްވެސް އިންވެސްޓްމަންޓެއް ގެނެވިފައިނުވާ ކަމަށް މަތިވެރި ދާއިރާގެ މެމްބަރު ހަސަން ޒަރީރު ވިދާޅުވެއްޖެއެވެ.

ސަރުކާރުގެ ފަރާތުން، ހިތަދޫ މެދު ދާއިރާގެ މެންބަރު އަޙްމަދު އަޒާން މަރުޒޫޤު ހުށަހަޅުއްވާފައިވާ، ފޮރިން އިންވެސްޓްމަންޓްގެ ބިލަށް ބަހުސް ކުރައްވަމުން ޒަރީރު ވިދާޅުވީ، މިފަދަ ބިލެއް ހުށަހެޅުއްވުމުގެ މައިގަނޑު މަޤްސަދުގެ ތެރޭގައި ރާއްޖޭގައި ބޭރުގެ އިންވެސްޓުމެންޓުތައް ހިމާޔަތް ކުރުމާއި އެތެރޭގެ އިންވެސްޓުމެންޓުތައް ހިމާޔަތްކުރުން ހިމެނޭ ކަމަށެވެ.

މި ޤައުމުގައި ހިނގަމުންދާ ކުދި އަދި މެދު ފަންތީގެ ވިޔަފާރިތަކަށް އޮތް އެންމެ ބޮޑު ގޮންޖެހުމަކީ ކެޕިޓަލް އިންވެސްޓްމަންޓް ހޯދުމުގެ ދަތިކަން. ފައިސާ ބޭންކް ތަކުގައި ބެހެއްޓޭނެ ނިޒާމު އެބަ ޖެހޭ ހަމަޖެހެން. އަދި އެ ފަރާތްތަކަށް މިހާރަށްވުރެ ރަނގަޅު ރޭޓެއްގައި ލޯނު ދެވޭނެ ގޮތްތަކެއް އެބަ ޖެހޭ ހަމަޖެހިގެންދާން - ޒަރީރު ވިދާޅުވިއެވެ.

އިތުރަށް ވާހަކަފުޅު ދައްކަވަމުން ޒަރީރު ވިދާޅުވީ، ނިމިދިޔަ 5 އަހަރު މި ޤައުމަށް އައި އެއްވެސް ފޮރިން އިންވެސްޓްމަންޓެއް ނެތް ކަމަށާއި، ސަރުކާރު ތަކުން ޢަމަލުކޮށްފައިވާ ގޮތުން ރާއްޖެއަށް ލިބެން ޖެހޭ ނަފާވެރިކަން ލިބިފައިނުވާ ކަމަށެވެ.

މި ޤައުމަކީ ވިޔަފާރި ކުރަން ފަސޭހަ ތަނެއް. ވިޔަފާރިއަށް ފަހި ތަނެއް، އެހެންކަމުން މިކަމާ ގުޅޭ ޤާނޫނެއް އޮތުމަކީ ވަރަށް މުޙިއްމު ކަމެއް - ޒަރީރު ވިދާޅުވިއެވެ.

ބޭރު ގައުމުތަކުން ރާއްޖެއަށް ލިބުނު ބޮޑެތި އިންވެސްޓުމެންޓުތަކަށް ކުރީ ސަރުކާރުން ގަސްތުގައި ފުރައްސާރަކޮށް އެ އިންވެސްޓުމެންޓުތައް ރާއްޖެ އަޔަނުދިން ކަމަށްވެސް ބައެއް މެމްބަރުން މިއަދުގެ ޖަލްސާފައި ވަނީ ފާހަގަ ކުރައްވާފައެވެ.