މުސްތޮ މިސާލު ނެންގެވީ މާޒީން، ނަތީޖާއަކީ މާލެއަށް ނޭވާ ލެވެންވެސް ނެތުން!

މާލެ ތޮއްޖެހިއްޖެ ކަމަށާއި، ރައްޔިތުންނަށް ނޭވާލެވެންވެސް ނެތް ކަމަށް މާފަންނު ހުޅަނގު ދާއިރާގެ މެމްބަރު މުޙައްމަދު މުޞްތަފާ އިބްރާޙިމް (އިމްނާ މުސްތޮ) ވިދާޅުވެއްޖެއެވެ.

މުސްތޮ މިހެން ވިދާޅުވީ، ބިނާވެށި ޕްލޭން ކުރުމާއި ހިންގުމުގެ ބިލާ ގުޅޭގޮތުން މިއަދުގެ މަޖިލީހުގައި ވާހަކަފުޅު ދައްކަވަމުންނެވެ.

ރާއްޖެ ތަރައްޤީ ކުރުމުގެ ވިސްނުމެއް އެންމެ ފުރަތަމަ އަޅުގަނޑުމެން ތެރެއަށް އައީ އެންމެ ފުރަތަމަ ޖުމްހޫރިއްޔާގައި، އެއީ ސުންމުވުލް އަމީރު މުޙައްމަދު އަމީން ދޮށިމޭނާ ކިލެގެފާނާ ހިސާބުން. އެއީ ތަރައްޤީގެ ޕްލޭނެއް ކުރެވިގެން ދިވެހިރާއްޖޭގައި ވެރިކަމެއް ހިންގަން ފެށުނު ހިސާބު. އެއާ ގުޅިގެން އައި ދެވަނަ ވެރިކަމަކީ މާ ބޮޑު ޕްލޭނެއް ނެތި ދިޔަ ވެރިކަމެއް. ތިން ވަނަ ވެރިކަމާ ހަމައަށް ދިޔައިރު އަޅުގަނޑުމެންނަށް ފެނިގެން ދިޔައީ ތަރައްޤީގެ 8 ޕްލޭނެއް ލިޔެވިގެން ތަސައްވަރެއް އޮވެގެން ކުރިއަށް ދިޔަތަން. އޭގެ ފަހުން އަނެއްކާވެސް އަޅުގަނޑުމެންނަޑށް ފެނިގެން ދިޔައީ މިފަދަ އެއްވެސް ޕްލޭނެއް ނެތި ކުރިއަށް ދިޔަ ތަން. ނަތީޖާއަކަށްވެގެން ދިޔައީ އަޅުގަނޑުމެންގެ މާލެ މި އޮއް ޙާލަތަށް މާލެ ދިޔުން. ތޮއްޖެހިފައިވާ މާލެއަށް ރައްޔިތުން ނޭވާލާނެ ގޮތެއްވެސް ނެތް. - މުސްތޮ ވިދާޅުވިއެވެ.

މީގެ އިތުރުން މުސްތޮ ވިދާޅުވީ، ނިމިގެން މިދިޔަ ސަރުކާރުންވެސް ފެނިގެން ދިޔައީ ޤާނޫނެއް ނެތި ނަމަވެސް، ވަކި ގޮތަކަށް ތަރައްޤީ ކުރެވެމުން އައި ބިންތައް އުޞޫލުތަކާ ޚިލާފަށް ބަހާލިތަން ކަމަށާއި، ޤާނޫނާ ޚިލާފަށް އެތައް ކަމެއް ކޮށްފައިވާ ކަމަށެވެ. އެގޮތުން މުސްތޮ ފާހަގަ ކުރެއްވީ ކުރީ ސަރުކާރުން ގުޅީފަޅުން ގޯތި ދޫކޮށްފައިވާ ގޮތެވެ.

ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި "ބިންވެރިޔާ" ސްކީމްގެ ދަށުން ހުޅުމާލެ އިން ހިލޭ ދޫކުރި ގޯތިތަކުގެ ސަބަބުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ލިބުނު މާލީ ގެއްލުން ބެލުމަށް ހާއްސަ އޮޑިޓެއް ހެދުމަށް އޮޑިޓާ ޖެނެރަލްގެ އޮފީހަށް އަންގަން ރައްޔިތުންގެ މަޖިލީހުގެ މާލިއްޔަތު ކޮމެޓީންވެސް ވަނީ ނިންމާފައެވެ.

މާލިއްޔަތު ކޮމިޓީގެ ބައްދަލުވުމުގައި އެ އޮޑިޓް ހެދުމަށް ހުށަހެޅުއްވީ ފުވައްމުލަކު އުތުރު ދާއިރާގެ ޕީއެންސީ މެންބަރު ހަމަދު އަބްދުﷲއެވެ. އެ ހުށަހެޅުން ފާސްވެފައިވަނީ ކޮމިޓީ ބައްދަލުވުމުގައި އެ ވަގުތު ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.

ހަމަދު ހުށަހެޅުއްވި މައްސަލައިގައި ވަނީ މާޗް 2019 އިން ފެށިގެން ނޮވެމްބަރު 17، 2023 ގެ ނިޔަލަށް ހިންގި ގޯއްޗާ ގުޅޭ މުއާމަލާތައް ބެލުމަށް އެސްޑީއެފްސީގެ ހާއްސަ އޮޑިޓެއް ހެދުމަށެވެ. އަދި ބިންވެރިޔާ ސްކީމްގެ ދަށުން ދިން ގޯތިތަކާ ގުޅިގެން އެޗްޑީސީ އަށް އެއްވެސް ބަދަލެއް ދޭން ޖެހޭތޯ ބެލުމަށް ވެސް އޭނާ ހުށަހެޅުއްވިއެވެ.

ކޮމިޓީ ބައްދަލުވުމުގައި ހަމަދު ވިދާޅުވި ގޮތުގައި މިކަމަކީ އެއްވެސް މީހެއްގެ އަތުން ގޯތި އަތުލުމަށް ކުރާ ކަމެއް ނޫން ކަމަށެވެ.