12 އަހަރުވީ އިރުވެސް އިންޝިއުރެންސްއާ ގުޅޭ ސާފު ޤާނޫނެއް ނެތްކަމީ ހިތާމައެއް - އިއްބެ

ފުވައްމުލަކު ދެކުނު ދާއިރާގެ މެމްބަރު އިބްރާޙިމް ޙުސައިން

12 އަހަރުވީ އިރުވެސް އިންޝިއުރެންސްއާ ގުޅޭ ސާފު ޤާނޫނެއް ނެތް ކަމަށާއި، ޤައުމުތައް ތަރައްޤީވެގެން އަންނައިރު އިންޝިއުރެންސްއާ ގުޅޭ ޤާނޫނެއް އޮތުމަކީ މުޙިއްމު ކަމެއް ކަމަށް ފުވައްމުލަކު ދެކުނު ދާއިރާގެ މެމްބަރު އިބްރާހިމް ޙުސައިން (އިއްބެ) ވިދާޅުވެއްޖެއެވެ.

އިއްބެ މިހެން ވިދާޅުވީ، މިއަދުގެ މަޖިލިސް ޖަލްސާގައި ވާހަކަފުޅު ދައްކަވަމުންނެވެ.

އިންޝުއަރެންސްއާ ގުޅޭ ސާފު ޤާނޫނެއް މިއަދާހަމައަށް އައިއިރުވެސް ނެތްކަން އަޅުގަނޑު ފާހަގަކޮށްލަން. އެގޮތުން ބަލާއިރު، މީގެ 12 އަހަރު ކުރިން އިޖްތިމާޢީ، ޞިއްޙީ އިންޝިއުރެންސް ޤައުމީ ނިޒާމުގެ ޤާނޫނެއް އޮތްއިރު، މި ބުނެވުނު ޤާނޫނުގެ ތެރޭގައި ކަށަވަރުނުވާ ގިނަ ކަންތައްތަކެއް ހުރިކަން އަޅުގަނޑު ފާހަގަ ކުރަން. އެކަންކަން އިސްލާޙުކުރުމުގެ ނަމުގައި 18 އޯގަސްޓް 2019 ގައި އެކި ނަންނަމުގައި 3 އިސްލާޙެއް ބުނެވިދިޔަ ޤާނޫނަށް ހުށަހެޅިފައިވާކަން ފާހަގަކޮށްލަން - މިއަދުގެ ޖަލްސާގައި އިއްބެ ވިދާޅުވިއެވެ.

މީގެ އިތުރުން އިއްބެ ވިދާޅުވީ، 12 އަހަރު ތެރޭގައި މި ދެންނެވުނު ޤާނޫނު ތަރައްޤީވެގެން އައިސްފައިނުވާކަމާށާއި، ރާއްޖެ ތަރައްޤީވެގެން ދާއިރު އިންޝިއުރެންސް ޤާނޫނަށް އިސްލާޙު ނުގެނެވި މިހާ ގިނަ ދުވަސްތަކެއްވެފައިވާކަމީ ކަންބޮޑުވާކަމެއްކަމަށެވެ.

މީގެ އިތުރުން، އިންޝިއުރެންސް ކުންފުނިތަކަކީ ވަރަށް ބޮޑު ފައިދާއެއް އުފައްދަމުން އަންނަ ކުންފުނިތަކެއްކަން ފާހަގަކޮށް އިއްބެ ވިދާޅުވީ އޭގެ ސަބަބުން ރާއްޖޭގެ އިޤްތިޞާދަށްވެސް ރަނގަޅު އަސަރުތަކެއް ކުރާނެ ކަމަށެވެ.

އިބްރާޙިމް ޙުސައިން