ބިދޭސީން ރާއްޖޭގައި މުޒާހަރާ ކުރުން ގިނަވާތީ މެމްބަރު ޙުސްނީގެ ހުށަހެޅުމެއް!

ބޭރު ޤައުމެއްގެ މީހެއް ކަމުގައިވިޔަސް ދިވެއްސެއްވިޔަސް ޤާނޫނު އަސާސީން ލިއްބައިދޭ އިޙްތިޖާޖު ކުރުމުގެ ހައްޤު އޭގެ އެންމެ ފުޅާ ދާއިރާގައި ލިބޭނެ ކަމަށާއި، ނަމަވެސް ހުދޫދުން ބޭރުން އެކަން ކުރަން ފުރުޞަތު ދެވިގެން ނުވާނެ ކަމަށް މަނަދޫ ދާއިރާގެ މެމްބަރު ޙުސްނީ މުބާރިކް ވިދާޅުވެއްޖެއެވެ.

ޙުސްނީ މިފަދައިން ވިދާޅުވީ އިއްޔެގެ މަޖިލިސް ޖަލްސާގައި ވާހަކަފުޅު ދައްކަވަމުންނެވެ.

ބިދޭސީންގެ މައްސަލަތައް ހައްލުކުރުމަށް ހުށަހަޅާފައިވާ ބިލަށް ބަހުސްކުރައްވާ ހުސްނީ ވިދާޅުވީ، ރާއްޖޭގައި ބިދޭސީ މަސައްކަތްތެރިންގެ ކަންކަން ވަރަށް ރަނގަޅަށް ރެގިއުލޭޓުކުރަން ޖެހޭ ކަމަށެވެ.

އެގޮތުން ހުސްނީ ވަނީ ތިނަދޫގައި ބިދޭސީން ކުރި މުޒާހަރާ ވަރަށް ބޮޑަށް ކުށްވެރިކުރައްވާފައެވެ.

މި ފާހަގަކުރަނީ ދާދި ފަހުން ފެނިގެން ގޮސްފި ބިދޭސީ މަސައްކަތު މީހުން އެމީހުން ނިސްބަތްވާ ގައުމުގެ ދާޚިލީ ކަމަކާ ގުޅޭގޮތުން ރާއްޖޭގަ މުޒާހަރާކުރެވިގެން ދިޔަތަން. އަޅުގަނޑު ގަބޫލުކުރަނީ ގާނޫނުއަސާސީން ލިބިދޭ ހައްގަކަށް ވާތީ އެމީހުންނަށް ސުލްހަވެރިކަމާއެކު ކުރާ އިހުތިޖާޖަށް ފުރުސަތުދެވޭނެ. އެހެންނަމަވެސް ވަކި ހުދޫދެއްގެ ތެރޭގަ އެކަން އޮންނަންޖެހޭނެ ކަމަށް އަޅުގަނޑު ގަބޫލުކުރަނީ،މަނަދޫ ދާއިރާގެ މެންބަރު ހުސްނީ މުބާރަކު

ހުސްނީ ވިދާޅުވީ ބިދޭސީން ވެސް މަސައްކަތުގެ މާހައުލުގައި ދިމާވާ ތަފާތުކުރުންތަކާއި، ލިބިދޭންޖެހޭ ހައްގުތަކެއް ނުދޭކަމަށް ވާނަމަ އެކަންކަމުގެ މައްޗަށް ސުލްހަވެރިކަމާއެކު އިހުތިޖާޖުކުރުން ގާނޫނުއަސާސީގެ ދަށުން ކަށަވަރުކޮށްދޭ ކަމަށެވެ. އެހެންނަމަވެސް އެ މީހުންގެ ގައުމުގައި ހިނގަމުންދާ ދާޚިލީ ކަމަކާ ގުޅޭގޮތުން ރާއްޖޭގައި މުޒާހަރާކޮށް އިހުތިޖާޖުކޮށް، އެކަންކަން އެގޮތަށް ކުރުމުގެ ފުރުސަތު ދެވިގެންވާނެ ކަމަށް ދެކެވަޑައިނުގަންނަވާ ކަމަށް އޭނާ ވިދާޅުވިއެވެ.

އިސްލާހަށް ބަހުސް ކުރައްވަމުން ގިނަ މެންބަރުން ވިދާޅުވީ، ރާއްޖެއަށް ބިދޭސީން ގެނައުމަށް ފަހު އެ މީހުން އުޅޭ ނޫޅޭގޮތް ބެލުމެއް ނެތި ހިތަށް އެރި އުސޫލަކުން ދޫކޮށްލާކަމީ ހަގީގަތެއް ކަމަށެވެ. އަދި އެ ބިދޭސީން ނަތީޖާއެއްގެ ގޮތުން އެކި ރަށްތަކުން ދަތުރުކޮށް، މާލޭގެ ސަރަހައްދުގައި އެކި މަސައްކަތްތައް ކުރަމުން ގެންދާކަމަށް އޭނާ ވިދާޅުވި އެވެ.

މިގޮތަށް އުޅޭ ބިދޭސީންގެ ކަންކަން ރެގިއުލޭޓު ނުކުރެވުމުގެ ނަތީޖާއެއްގެ ގޮތުން ދައުލަތަށް ލިބެން ޖެހޭ ޓެކްސްތަކައި ފީތައް ނުލިބޭކަމަށްެވެސް މެމްބަރުން ފާހަގަ ކުރެއްވިއެވެ.

އަދި ބިދޭސީއަކު ކުންފުންޏަށް ފިލައިގެންދާ ހާލަތެއްގައި، އެ މައްސަލައެއް ހުށަހެޅުމުން ވެސް އޭނާ ހޯދުމަށް ފޮޓޯއެއް އާންމު ކުރުމުން ފިޔަވައި ކަމާއިބެހޭ ފަރާތްތަކުން އެކަށީގެންވާ މަސައްކަތެއް ނުކުރާކަންވެސް ފާހަގަކޮށްފައިވެެެއެވެ.