100 ފޫޓުގެ ދޯންޏެއްގައި 250 ގެ އިންޖީނެއް އަޅައިގެން ނުދުއްވޭނެ - ޒަރީރު

އައްޑޫގެ ކަރަންޓްގެ މައްސަލަ އަކީ ކެޕޭސިޓީ ނެތިގެން ދިމާވެގެން އުޅޭ މައްސަލައެއް ކަމަށާއި، ކުރީ ސަރުކާރުން އެންމެ ބޮޑަށް އިހުމާލުވެފައިވާ އަތޮޅަކީ އެއީ ކަމަށް މަތިވެރި ދާއިރާގެ މެމްބަރު ޙަސަން ޒަރީރު ވިދާޅުވެއްޖެއެވެ.

ޒަރީރު މިހެން ވިދާޅުވީ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުންނެވެ.

100 ފޫޓުގެ ދޯންޏެއްގައި 250 ހޯސް ޕަވަރުގެ އިންޖީނެއް އަޅައިގެން އެ ދުއްވޭނެ ގޮތެއް އަޅުގަނޑަކަށް ނުވިސްނޭ. 4000 ބަސްތާ އެބަ އަރުވާ. ދެން އެފަދަ ޙާލަތެއްގައި އެ އިންޖީނުގައި އެ ދޯނި ދުއްވަން ހެދީމަ އެ ދޯނި ހުއްޓޭނީ. ހަޤީޤަތަކީ ޢިއްޒަތްތެރި ރައީސް، އައްޑޫއަށް ދިމާވެގެން މި އުޅެނީ އެކަހަލަ މައްސަލައެއް. އައްޑޫއަށް ދިމާވެގެން މިއުޅޭ މައްސަލަ އަކީ ބޭނުންވާ ވަރަށް ކަރަންޓުގެ ކެޕޭސިޓީ ނެތުން. - ޒަރީރު ވިދާޅުވިއެވެ.

ޒަރީރު އިތުރަށް ވިދާޅުވީ ނިމިދިޔަ 5 އަހަރު އެންމެ ބޮޑު އިޙުމާލެއް ވެފައި އޮތް އަތޮޅަކީ އައްޑޫ އަތޮޅު ކަމަށެވެ.

އެކަމަކު މިތާ ތިބީ ހުސް އައްޑު އަތޮޅު މެމްބަރުން. ރައީސް ކަމަށްވެސް އޭގެ ބޭފުޅެއް. ނައިބަކަށްވެސް އޭގެ ބޭފުޅެއް. މުޅި ސަރުކާރުގައި ތިބީ އެބޭފުޅުން - ޒަރީރު ވިދާޅުވިއެވެ.

ހިތަދޫގައި ކަރަންޓް ދިނުމަށް ބޭނުން ކުރާ މައި އެޗް.ވީ ކޭބަލަކަށް ދިމާވި މައްސަލައަކާއި ގުޅިގެން އެކަން ހައްލު ކުރެވެންދެން ދޭތެރެ ދޭތެރެއިން އެއް ގަޑިއިރުގެ ވަގުތަކަށް ހިތަދޫގެ އެކި ސަރަހައްދުތަކުން ކަރަންޓް ކަނޑަން ވަނީ ނިންމާފައެވެ.

ފެނަކަ ހިތަދޫ ބްރާންޗުން ބުނީ، އެޗް.ވީ ކޭބަލަށް ދިމާވި މައްސަލައަކާއި ގުޅިގެން ކަރަންޓް ކެނޑެން މެދުވެރި ނަމަވެސް އެ މައްސަލަ ހައްލު ކުރަމުން އަންނަ ކަމަށެވެ. އެގޮތުން މައްސަލަ ހައްލު ކުރަމުން އަންނަ ވަގުތު ހިތަދޫގެ 14 ސަރަހައްދަކުން އެކި ވަގުތު ކަރަންޓް ކެނޑޭނެ ކަމަށް ފެނަކައިން ވަނީ ބުނެފައެވެ.

އެގޮތުން ކެނޑޭނެ ކަމަށް ބުނެފައިވަނީ މެނަންގެ ސަރަހައްދު، ނިއުސީޒަން ސަރަހައްދު، ބީ.އޭޕީ.ސީ ސަރަހައްދު، ފެނަކަ ހިތަދޫ އޮފީސް ސަރަހައްދު، މެދުވަލު ސްކޫލް ސަރަހައްދު، ކުރީގެ ކައްޓި ސަރަހައްދު، ކެމްޕަސް 1 ސަރަހައްދު، ކައުންސިލް އިދާރާ ސަރަހައްދު، ވެމްކޯ ހިތަދޫ އޮފީސް ސަރަހައްދު، އިންސިނެރޭޓަރ ސަރަހައްދު، އޭ.އީ.އެޗް ސަރަހައްދު، އާގަލާ އެގްރޯ ސަރަހައްދު، ހިތަދޫ ފްލެޓް ސަރަހައްދުގެ އިތުރުން ނޭޗަރު ޕާކު ސަރަހައްދެވެ.