އައްޑޫ ކަރަންޓުގެ މައްސަލަ އަކީ ބަޔަކު ކުރާ ޖެއްސުމެއް ނޫންބާ؟ - މުސްތޮ

މުޙައްމަދު މުސްތަފާ އިބްރާހިމް

އައްޑޫގެ މަގުތަކުން ކަރަންޓް ކެނޑުމަކީ މި ސަރުކާރުގެ އިހުމާލުން ދިމާވާ މައްސަލައެއް ނޫން ކަމަށާއި، އެ މައްސަލަ އަކީ އައްޑޫގެ މަގު ހެދުމުގެ މަޝްރޫޢުގެ ތެރެއިން ދިމާވާ މައްސަލައެއް ކަމަށް މާފަންނު ހުޅަނގު ދާއިރާގެ މެމްބަރު މުޙައްމަދު މުޞްތަފާ އިބްރާހިމް (އިމްނާ މުސްތޮ) ވިދާޅުވެއްޖެއެވެ.

“ އަޅުގަނޑު ބަލާލިއިރުގައި މި ވާގޮތަކީ އައްޑޫގެ މަގުތައް ހެދުމުގެ މަޝްރޫޢުގެ ތެރެއިން ސަޕްލައި ކެނޑެނީ. އެންމެ ފަހުން ކެނޑުނު ސަޕްލައި ރޭގެ ވަގުތެއްގައި މި ރަނގަޅު ކުރީ. އައްޑޫ މަގުތައް ހަދާ ކުންފުނި އެފްކޮންސް ގެ މީހުންގެ ޖެއްސުމެއް ނޫންބާއޭވެސް ބައެއް ފަހަރަށް އެބަ ހީވޭ” މުސްތޮ ވިދާޅުވިއެވެ.

މިއަދުގެ ޖަލްސާގައި މުސްތޮ އިތުރަށް ވިދާޅުވީ ކެޕޭސިޓީ އިތުރު ކުރުމަކީ ކޮންމެހެން ބޭނުން ކަމެއް ކަމަށާއި، މި ސަރުކާރުން އައްޑޫގެ ކަރަންޓުގެ މައްސަަލައަށް ހާއްޞަ އިސްކަމެއް ދީގެން މަސައްކަތް ކުރާ ކަމަށެވެ.

މިއަދުގެ މަޖިލިސް ޖަލްސާގައި ވާހަކަފުޅު ދައްކަވަމުން މުސްތޮ ވިދާޅުވީ 4.3 ބިލިއަން ރުފިޔާއިން ފެނަކަ ދަރުވާލާފައި އޮތްކަން ކުރީ ސަރުކާރަށްވެސް އެނގޭ ކަމަށާއި ނަމަވެސް އެ މައްސަލަ ބަލަން ބޭނުން ނުވީ ކަމަށެވެ. އަދި ކަރަންޓްގެ ޔަޤީންކަން ހޯދައިދޭނީ މި ސަރުކާރުން ކަމަށްވެސް މުސްތޮ ވިދާޅުވިއެވެ.

މުޙައްމަދު މުޞްތަފާ އިބްރާހިމް