ޤާނޫނީ ފަންނުގެ ޤާނޫނަށް ގެންނަ އިސްލާޙާއެކު ބަންޑާރަ ނައިބުވެސް މިނިވަންވެގެންދާނެ - މުސްތަފާ

ޤާނޫނީ ފަންނުގެ ޤާނޫނަށް ގެނެވޭ މުޙިއްމު އިސްލާޙުތަކާއެކު ބަންޑާރަ ނައިބުވެސް މިނިވަންވެގެން ދާނެ ކަމަށް މާފަންނު ހުޅަނގު ދާއިރާގެ މެންބަރު މުޙައްމަދު މުޞްތަފާ އިބްރާޙިމް ވިދާޅުވެއްޖެއެވެ.

މުސްތަފާ މިހެން ވިދާޅުވީ މިއަދުގެ ޖަލްސާގައި ވާހަކަފުޅު ދައްކަވަމުންނެވެ.

“މިއަދު ހުށަހެޅިގެން މިދާ އިސްލާޙާ ގުޅިގެން ހަޤީޤަތުގައި ޤާނޫނީ ވަކީލުންނަށް ވަރަށް ބޮޑު ނުފޫޒަކުން އެއްކިބާވެގެން މިނިވަން ބައެއްގެ ގޮތުގައި މަސައްކަތް ކުރުމުގެ ފުރުޞަތު ބާ ކައުންސިލަށް ލިބިގެންދާ މަންޒަރު އަޅުގަނޑުމެންނަށް މި ފެންނަނީ. ޤާނޫނީ ވަކީލުންގެ މި ކައުންސިލް މިނިވަންވެގެންދާ މަންޒަރު. މި ހުށަހެޅުނު އިސްލާޙާއެކު ބަންޑާރަ ނައިބުވެސް މިނިވަންވެގެންދާނެ” - މުސްތަފާ ވިދާޅުވިއެވެ.

މީގެ އިތުރުން މުސްތޮ ވިދާޅުވީ ޝަރުޢީ ދާއިރާ އިސްލާޙު ކުރެވޭނީ ޤާނޫނީ ވަކީލުންގެ ބައިވެރިވުން ލިބިގެން ކަމަށާއި، ބައެއްގެ ނުފޫޒުން ޝަރުޢީ ދާއިރާ މިނިވަން ކުރުމަށް އެކުވެރިކަމާއެކު މަސައްކަތް ކުރަން ޖެހޭ ކަމަށެވެ.

މި އިސްލާޙާއެކު މި ލިބޭ ބާރުވެރިކަމާއި އެކުވެރިކަމާއެކު ކުރެވޭ މަސައްކަތުގެ ރޫހާއެކީގައި އަޅުގަނޑު ހަމަ ދަންނަވާލަން ބޭނުންވަނީ ދިވެހިރާއްޖޭގެ ޤާނޫނީ ވަކީލުންނަށް، ޝަރުޢީ މަރުޙަލާގައި އެންމެ މުޙިއްމު ރޯލެއް އަދާ ކުރައްވާ ބޭފުޅުންނަކީ ޤާނޫނީ ވަކީލުންނޭ - މުސްތޮ ފާހަގަ ކުރެއްވިއެވެ.