ބާ ކައުންސިލްގެ އެކްސްކޯ މެމްބަރެއް ވަކިކުރެވެންވާނީ އެކަމެއް ފުރިހަމައަށް ބެލުމަށް ފަހު - ޙުސްނީ

ބާ ކައުންސިލްގެ އެގްޒެކެޓިވް ކޮމިޓީގެ މެމްބަރެއް ވަކި ކުރުމަށް، ގާނޫނުގައި ބުނާ އަދަދަށް ވަކީލުންގެ ފަރާތުން ލިއުމުން މައްސަލަ ހުށަހެޅުމުން އެކަށީގެންވާ ދިރާސާއެއް ނުކޮށް ވޯޓަށް އެހުމަކީ ރަނގަޅު ގޮތްކަމަށް ނުދެކޭކަމަށް މަނަދޫ ދާއިރާގެ މެމްބަރު ހުސްނީ މުބާރަކް ވިދާޅުވެއްޖެ އެވެ.

ބާކައުންސިލްގެ އެގްޒެކެޓިވް ކޮމިޓީން ބަންޑާރަ ނައިބު އުނި ކުރުމަށް ސަރުކާރުގެ ފަރާތުން ހުށަހަޅާފައިވާ އިސްލާހަށް ތާއީދު ކުރައްވައި ހުސްނީ ވިދާޅުވީ ވަކީލުންގެ ކަންކަން ރެގިލޭޓު ކުރާ އިދާރާއެއްގައި އޭޖީ ހުންނެވުމަކީ ގާނޫނު ފަރުމާ ކުރެވިގެން އަންނަންވާނެ ގޮތެއް ނޫންކަމަށެވެ. އަދި ބާކައުންސިލް އައުމު ކުރިޔަށް ވެސް ވަކީލުންގެ ސުލޫކީ މައްސަލަތައް ބަލައި އަޅާ ފިޔަވަޅެއްގެ ގޮތުން ލައިސެންސް ބާތިލުކޮށް ހިފަހައްޓާފައިވާކަން މާޒީން އެނގެން އެބައޮތްކަމަށް ހުސްނީ ވިދާޅުވި އެވެ.

ގާނޫނުގައި މިހާރު އޮތް ގޮތުން، 100 ވަކީލުންގެ ސޮޔާއި އެކު އެކްސްކޯ ކޮމިޓީގެ މެމްބަރެއް ވަކި ކުރުމަށް ހުށަހެޅިދާނެ އެވެ. އެ ހުށަހެޅުން ފާސް ވާނީ، އެގްޒެކެޓިވް ކޮމިޓީގެ މެމްބަރުންގެ ތެރެއިން ތިންބައިކުޅަ، ދެބައިގެ އަޣުލަބިއްޔަތު ވޯޓުންނެވެ. ހުސްނީ ވިދާޅުވީ ކައުންސިލްގެ މެމްބަރެއް ވަކި ކުރުމަށް ބޭނުން ވާތީ ގާނޫނުގައި ބުނާ އަދަދަށް ސޮއި ހަމަކޮށް ހުށަހެޅުމުން މައްސަލަ ބަލަން ޖެހޭ މިންވަރަށް ނުބަލައި ވޯޓަކަށް ދިއުމަކީ އެންމެ ރަނގަޅު ގޮތްކަމަށް ނުދެކޭކަމަށެވެ.

ގާނޫނީފަންނުގެ 16 ވަނަ މާއްދާގައި ބުނާ ގޮތުން ބަންޑާރަ ނައިބު ފިޔަވައި ކައުންސިލުގެ އެގްޒެކެޓިވް ކޮމިޓީގެ މެންބަރަކު މަގާމުން ވަކިކުރެވޭނީ، ޤާނޫނީ ވަކީލުންގެ ތެރެއިން 100 އަށްވުރެ މަދު ނޫން އަދަދެއްގެ ގާނޫނީ ވަކީލުން، އެ މެންބަރަކު ވަކިކުރުމަށް ބާ ކައުންސިލަށް ލިޔުމުން ހުށަހެޅުމުން 15 ދުވަހުގެ ތެރޭގައި އެ މައްސަލަ އެޖެންޑާ ކުރަންވާނެ އެވެ.

އެގްޒެކެޓިވް ކޮމިޓީގެ މެމްބަރެއް ވަކި ކުރުމަށް ހުށަހެޅިދާނެ ހާލަތްތަކަކީ މަސްއޫލިއްޔަތު އަދާ ނުކުރުމާއި، ތަކުރާރުކޮށް މަސްއޫލިއްޔަތު އަދާކުރުމުގައި ފަރުވާކުޑަކުރުން އަދި މަސްލަހަތު ފުށުއަރާ ފަދަކަމެއް ދިމާވުމެވެ.