ޗައިނާ ސަފީރު މަނަދޫ ދާއިރާގެ 3 ރަށަށް: ފެހި ސިގްނަލް ލިބުނު އުއްމީދީ ދަތުރެއް!

ޗައިނާއިން ދިވެހިރާއްޖެއަށް ކަނޑައަޅުއްވާފައިވާ ސަފީރު، ހަރ އެކްސެލެންސީ ވަންގް ލީޒިންގް، މަނަދޫ ދާއިރާގައި ހިމެނޭ 3 ރަށަށް ވަޑައިގެންފިއެވެ.

ސަފީރުގެ މި ދަތުރުފުޅުގައި މަނަދޫ ދާއިރާގެ އިއްޒަތްތެރި މެމްބަރު އަލްއުޞްތާޛު ޙުސްނީ މުބާރިކް އާއި ކެނދިކުޅުދޫ ދާއިރާގެ އިއްޒަތްތެރި މެމްބަރު އަލްފާޟިލް އަފޫ ޙާމިދު ބައިވެރިވެވަޑައިގެންނެވިއެވެ.

މަނަދޫ ދާއިރާގައި ހިމެނޭ މަނަދޫ، މާފަރު، ލަންދޫ މި 3 ރަށަށް ޗައިނާ ސަފީރު ކުރެއްވި މި ދަތުރުފުޅުގައި އެ ތިން ރަށުގެ މުއައްސަސާތަކުގެ ވެރިންނާ ބައްދަލުކޮށް އެހީތެރިކަން ފޯރުކޮށްދެވިދާނެ ދާއިރާތަކާ ގުޅޭ ގޮތުން މަޝްވަރާ ކުރެއްވިއެވެ.

މީގެ އިތުރުން މަނަދޫގައި ހުންނަ ނ.އަތޮޅު ހޮސްޕިޓަލަށް ވަޑައިގެން އެތަނުގެ ޙާލަތު ވަރަށް ގާތުން ބައްލަވާލެއްވިއެވެ.

“ސަފީރުގެ މި ދަތުރު ފުޅަކީ ވަރަށް ކާމިޔާބު ދަތުރުފުޅެއް. ކައުންސިލްތަކާ އެކު ރަނގަޅު ގުޅުމެއް އުފެެއްދުމަށް މިއީ ލިބުނު ވަރަށް ބޮޑު ފުރުޞަތެއް. 3 ރަށުގެ ކައުންސިލްގެ ފަރާތުން ލިބިލެއްވި އެއްބާރުލެއްވުމަށް ވަރަށް ބޮޑަށް ޝުކުރު ދަންނަވަން” ދާއިރާގެ މެމްބަރު ޙުސްނީ ވިދާޅުވިއެވެ.

ޗައިނާ ސަފީރުގެ މި ދަތުރުފުޅުގެ ސަބަބުން ކައިރި މުސްތަޤުބަލެއްގައި އެކަމުގެ ހެޔޮ ނަތީޖާ ފެންނާނެ ކަމަށް ދާއިރާގެ ތިން ރަށުގެ ރައްޔިތުން އުއްމީދު ކުރެއެވެ.