8 ލައްކައަށް ލިބޭ ޖެންސެޓް ގަތީ 3.5 މިލިއަން ރުފިޔާއަށް - ޒަރީރު

އެމްޑީޕީ ސަރުކާރުގައި ފެނަކައަށް ހަދާލި ގޮތް ހުރިހާ ރައްޔިތުންނަށްވެސް ސާފުވާ ކަމަށާއި، އެގޮތުން 8 ލައްކަ އަށް ލިބޭ ޖެން ސެޓް ގަތީ 3.5 މިލިއަން ރުފިޔާއަށް ކަމަށް މަތިވެރި ދާއިރާގެ މެމްބަރު ޙަސަން ޒަރީރު ވިދާޅުވެއްޖެއެވެ.

ޙަސަން ޒަރީރު މިހެން ވިދާޅުވީ މިއަދުގެ މަޖިލީހުގައި ވާހަކަފުޅު ދައްކަވަމުންނެވެ.

ދިހަ ހާސް ރުފިޔާއަށް ލިބޭ ފިލްޓަރެއް ހިފައިގެން އައްޑޫއަށް ދާ ދޯނީގެ އަގަކީ 6 ލައްކަ ރުފިޔާ. ސުބުހާނަﷲ. ދެން ކީކޭތޯ އަޅުގަނޑު ބުނާނީ. މިއީ އެމްޑީޕީ ސަރުކާރުން މިކަން ކޮށްފައި އޮތް ގޮތް. - ޒަރީރު ވިދާޅުވިއެވެ.

އިތުރަށް ޒަރީރު ވިދާޅުވީ، ކަރަންޓްގެ ޚިދުމަތް ފަދަ އަސާސީ ޚިދުމަތެއް ފޯރުކޮށްދޭ ކުންފުންޏަކުން މި ފަދައިން ކަން ކުރުމަކީ ބަލައިގަނެވޭނެ ކަމެއް ނޫން ކަމަށާއި، މި ސަރުކާރުން މި ކަންކަން ހަމައަކަށް އަޅުވާނެ ކަމަށެވެ.

ފެނަކައިގެ އެމްޑީ ވިދާޅުވި، ނުފެށޭ ޕްރޮޖެކްޓްތަކަށްވެސް މީހުން ނަގާފަ ތިބި ވާހަކަ. ކޮންމެ މަހަކު މިލިއަނެއް މިލިއަނެއް ޚަރަދުވެގެން އެ ދަނީ. އެނގޭތީ މި ވާހަކަ މި ދައްކަނީ، ޒަރީރު ވިދާޅުވިއެވެ.

އެމްޑީޕީގެ ސަރުކާރުން ފެނަކަ އޮތީ ދަރުވާލާފައި. ކުރީ ސަރުކާރުން އެންމެ ބޮޑު ޚިޔާނާތެއް ހިންގާފައިވާ ތަނަކީ ފެނަކަ. 4.3 ބިލިއަން ރުފިޔާގެ ދަރަނި ހަމައެކަނި ފެނަކައިގައި އޮތް. ނަމަވެސް މިއަދު އެކަން ބަލާލީމަ އެ އަދަދު އެތައް ގުނައަކަށް ބޮޑު އެބަ ވޭ. ރައްޔިތުން އެބަ އާދޭ މިއީ ތިމަންނަ ކޮށްފައިވާ މަސައްކަތްތަކޭ. ނަމަވެސް އެ ލިޔުންތައް ނެތް ރެކޯޑު ކުރެވިފައެއް. ވޭތުވެދިޔަ ތިން އަހަރު ކޮށްފައި ހުރި މަސައްކަތްތައް މިއީ. ނަމަވެސް ފެނަކައިގެ އެއްވެސް ފޮތެއްގައި ނެތް އެ ވާހަކަތައް ދައްކާފައެއް. - މުޢާޒް ދާދި ފަހުން ވަނީ ވިދާޅުވިއެވެ.

މީގެ އިތުރަށް މުޢާޒް ވިދާޅުވީ، މި އޭޓީއެމް އަޅަން ހަވާލުކޮށްފައިވަނީ 295،000 ރުފިޔާއަށް ކަމަށާއި، އެވަރުގެ ތަނެއް ހަދަން އޭރުގެ ރޭޓުން ބަލާއިރު 8 ލައްކަ ރުފިޔާ ޚަރަދުވާ ކަމަށެވެ.

އެ މަސައްކަތް ކުރަން އޮތީ ސޮއިކޮށްފައި ކަމަށާއި، މިއިން ކޮންމެ ޕްރޮޖެކްޓަކަށް 4 ލައްކަ ރުފިޔާ ޚަރަދުކޮށްފައިވާ ކަމަށްވެސް މުޢާޒް މިރޭ ވިދާޅުވިއެވެ.

 ފެނަކައިގެ ބިން ތަނުގައި އޭޓީއެމްތައް އަޅަމުން ދިޔައީ. އެ ބިންތަކުގައި އޭޓީއެމް އަޅާ އެތަނުގައި ސެކިއުރިޓީ ގާރޑެއް ބަހައްޓާ މުވައްޒަފަށް މުސާރަ ދީ އެ ހުރިހާ ކަމެއްވެސް ކުރަން ޖެހެނީ ފެނަކައިން. ފެނަކަ ކިހާ މުއްސަނދި ވީމަތޯ މިކަން ކުރަން ހަވާލުވާނީ. އެމްޑީޕީން ފެނަކަ މެދުވެރިކޮށް ހިންގި ޖަރީމާތައް އެ ހުރީ ފެންނަން. ވަރަށް ސާފުކޮށް އެބަ އެނގޭ ޚިޔާނާތް ވެފައި ހުރި ގޮތާއި، ޚިޔާނާތުގެ ފައިސާ ދިޔަ ގޮތްތައް އެބަ އެނގޭ - މުޢާޒް ވިދާޅުވިއެވެ.