މާފަރު އެއާރޕޯޓަށް ހާއްޞަ ދަތުރަކާއެކު ނޫނުގައި އާރުޓީއެލް ފަށަނީ

މާފަރު އިންޓަރނޭޝަނަލް އެއާރޕޯޓަށް ކުރުމަށް ހަމަޖެހިފައިވާ ޙާއްޞަ ދަތުރަކާއެކު ނ.އަތޮޅުގައި އާރުޓީއެލްގެ ޚިދުމަތް ފަށަން ތައްޔާރުވެއްޖެއެވެ.

މިކަމާ ގުޅޭގޮތުން މަނަދޫ ދާއިރާގެ މެމްބަރު ޙުސްނީ މުބާރިކް ކުރައްވާފައިވާ އެފްބީ ޕޯސްޓެއްގައި ވިދާޅުވެފައިވަނީ، ޚިދުމަތް ދިނުމަށް ބޭނުންކުރާ ލޯންޗުގެ ޓެސްޓް ދަތުރުތައް މިހާރު ކޮށްފައިވާ ކަމަށާއި، މި ހިނގާ ޖުލައި މަސް ތެރޭގައި ޚިދުމަތް ފެށިގެންދާނެ ކަމަށެވެ.

ނިމިދިޔަ ރައީސް އިބްރާޙިމް މުޙައްމަދު ސޯލިހުގެ ވެރިކަމުގައިވެސް މި ޚިދުމަތް ނ.އަތޮޅުގައި ފެށުމަށް އެކި ތާރީޚުތައް ދީފައިވެއެވެ. ނަމަވެސް ވެރިކަން ނިމުނު އިރުވެސް މި ޚިދުމަތް ފެށިފައެއް ނުވެއެވެ. ރައީސް ޑރ މުޙައްމަދު މުޢިއްޒުގެ ވެރިކަމުގައި މި ޚިދުމަތް ފަށާ އެންމެ ފުރަތަމަ އަތޮޅަަކަށް ނޫނު އަތޮޅު ހަމަޖައްސާފައިވާއިރު، މި ޚިދުމަތުގެ ސަބަބުން އަތޮޅުގެ އެކި ރަށްރަށުން އެއާޕޯޓަށް އަންނަން ބޭނުންވާ ފަރާތްތަކަށާއި، ވެރިކަން ކުރާ މަނަދުއަށް ދިއުމަށް ބޭނުންވާ ފަރާތްތަކަށް ލުއި ފަސޭހަވެގެންދާނެ ކަމަށް ގިނަ ރައްޔިތުން އުއްމީދު ކުރެއެވެ.

ނިމިދިޔަ ރައްޔިތުންގެ މަޖިލީހުގެ އިންތިހާބުގައިވެސް ކެނޑިޑޭޓުންގެ ގޮތުގައި، ޙާއްޞަކޮށް ސަރުކާރުގެ ކެނޑިޑޭޓުންގެ ގޮތުގައި ވާދަކުރެއްވި ބޭފުޅުންގެ ކިބައިން ދާއިރާގެ ރައްޔިތުން އެންމެ ބޮޑަށް އެދުނު އެއް ޚިދުމަތަކީވެސް މިއީއެވެ.