ކަފާލާތުގެ އުސޫލުތަކާއި ހެއްކާގުޅޭ ހަރުދަނާ އިސްލާހުތަކެއް ހިމެނޭހެން ޖިނާއީ އިޖުރާއަތުގެ ގާނޫނަށް އިސްލާހު ގެނައުމަށް ސަރުކާރުގެ ފަރާތުން މަޖިލީހަށް ހުށަހަޅައިފި އެވެ.

ކަފާލާތުގެ އުސޫލުތަކާއި ބަންދާމެދު ގޮތް ނިންމުމުގެ ކަންކަމަށް އިސްލާހުތަކެއް ހިމެނޭހެން ޖިނާއީ އިޖުރާއަތުގެ ގާނޫނަށް އިސްލާހު ގެނައުމަށް ސަރުކާރުގެ ފަރާތުން މަޖިލީހަށް ހުށަހެޅި ބިލް ސްޕޮންސާ ކުރެއްވީ ޖުޑިޝަރީ ކޮމިޓީގެ މުގައްރިރުކަންވެސް ކުރައްވާ މަޝްހޫރު ގާނޫނީ ވަކީލް ހުސްނީ މުބާރަކެވެ.

މި ބިލް މަޖިލީހަށް ތައާރަފްކޮށް މިއަދު ވަނީ މިބިލްގެ ފުރަތަމަ ކިޔުން އިއްވާފަ އެވެ.

ރައްޔިތުންގެ މަޖިލީހުގެ މަނަދޫ ދާއިރާގެ މެންބަރު ހުސްނީ ވިދާޅުވީ ސަރުކާރުގެ އަމާޒަކީ ޖިނާއީ އަދުލުގެ ނިޒާމް ހަރުދަނާކުރުން ކަމަށެވެ.

އަދުލު އިންސާފުގެ ނިޒާމު ހަރުދަނާކުރުމަށް ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި ކަފާލާތުގެ ދަށުން ބަންދުން ދޫކޮށްލުމުގެ ގާނޫނަކާއި، ނުހައްގުން ޖަލުގައި ބަންދުކުރާ މީހުންނަށް ލިބޭ ގެއްލުމުގެ ބަދަލު ދެވޭނެ ގާނޫނެއް އެކުލަވާލުމުކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.

ކަފާލާތަކީ ދުނިޔޭގެ ތަހުޒީބު ގައުމުތަކުގައި ވެސް އަމަލުކުރާ އުސޫލެއް ކަމަށާއި، ކުށުގެ ތުހުމަތުކުރެވޭ މަރުހަލާ އާއި، އިސްތިއުނާފު މަރުހަލާގައި ކަފާލާތު ލިބުމަކީ ހައްގެއް ކަމަށާއި، އެއީ ދުނިޔޭގެ ޑިމޮކްރެޓިކް ގައުމުތަކުގައިވެސް އަމަލުކުރާ އުސޫލުކަމަށް ރިޔާސީ އިންތިހާބުގެ ކެމްޕެއިންގެ ތެރޭގައި ރައީސް ޑރ. މުއިއްޒު ވިދާޅުވެފައިވެ އެވެ.