ދިވެހި ފިލްމް އިލްޒާމްގެ ފަސްޓް ލުކް ދައްކާލައިފި

ޔޫއްޕެ ޕްރޮޑަކްޝަނުން ޔޫޞުފް ޝަފީޢު ޑައިރެކްޓްކޮށް، މުޙައްމަދު ޢަބްދު الله ޕްރޮޑިއުސްކޮށް އުފައްދާ ފިލްމް އިލްޒާމްގެ ފަސްޓް ލުކް ދައްކާލައިފިއެވެ.

ފިލްމްގެ ޕޯސްޓަރާއި ޓެރެއިލާރ ރިލީސް ކުރުމަށް ރޭ ނޮވެލްގައި ބޭއްވި ރަސްމިއްޔާތުގައި ގިނަ އަދަދެއްގެ ފަންނާނުން ބައިވެރިވިއެވެ.

މި ރަސްމިއްޔާތުގައި ވާހަކަ ދައްކަވަމުން ޔޫޞުފް ޝަފީޢު (ޔޫއްޕެ) ބުނީ، މިއީ ވަރަށް ބޮޑު އުއްމީދެއް ކުރެވޭ ފިލްމެއް ކަމަށާއި، ބެލުންތެރިންނާ ހަމައަށް މި ފިލްމް ގެނެސްދިނުމަށްޓަކައި ރަނގަޅު މަސައްކަތްތަކެއް ކުރެވިފައިވާ ކަމަަށެވެ.

މި ފިލްމް އެޅުވުމަށް ހަމަޖެހިފައިވަނީ، 20 އޮކްޓޯބަރ 2025 ގައެވެ.

މި ފިލްމާ ގުޅޭގޮތުން  ޕްރޮޑިއުސަރ މުޙައްމަދު ޢަބްދު الله  ބުނީ، މިއީ ފިލްމީ ދާއިރާއާ ދުރުގައި ގިނަ ދުވަސްތަކެއް ހުރުމަށްފަހު އެނބުރި އައިސް ކުރެވުނު މަސައްކަތެއް ކަމަށާއި، މިއީ ވަރަށް ދުރާލާ ރޭވިގެން ކުރެވިފައިވާ ކާމިޔާބު މަސައްކަތެއް ކަމަށެވެ.

މިއީ މިހާތަނަށް ފެންނާނެ، ޔޫއްޕެގެ އެންމެ ކާމިޔާބު މަސައްކަތް - މުޙައްމާ ބުންޏެވެ.

ފިލްމް އިލްޒާމް އަމާޒުކުރެވިފައިވަނީ ރާއްޖޭގެ މުޖުތަމައުގައި  ހިނގަމުންދާ އަދި ހިނގާފައިވާ ބައެއް ހަގީގީ ހާދިސާތަކުން ހިޔާލު ނަގައި، އެކަންކަމުން ބެލުންތެރިންނަށް ހެޔޮ ރަނގަޅު މެސެޖްތަކެއް ފޯރުކޮށްދިނުމުގެ މަޤްޞަދުގައެވެ.

މި ފިލްމަކީ އިޖްތިމާއި އެތައްކަމަށް އަމާޒުކުރެވިފައިވާ ފިލްމެކެވެ. އެގޮތުން، ނަފްރަތާއި ހަސަދަ، ލޯތްބާއި ހިތާމަ، އެކުވެރިމަކާއި ދެކޮޅުވެރިކަން، އާއިލީ ހަސަދައާއި ފިތުނަ، ދަރިންނާއި މައިންފައިންގެ ގުޅުން މި ފިލްމްގައި ދައްކުވައިދީފައިވެއެވެ.

މި ފިލްމުގެ މައިގަނޑު މަންޒަރުތައް ޝޫޓުކޮށްފައިވަނީ އދ. ދަނގެތީގައެވެ.