ރައީސް މުއިއްޒަށް މަރުގެ އިންޒާރު ދިން މީހާ ހައްޔަރުކޮށްފި

ސޯޝަލް މީޑިއާގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒަށް މަރުގެ އިންޒާރު ދިން މީހާ މިރޭ ހައްޔަރުކޮށްފި އެވެ.

ފުލުހުން މީޑިއާތަކާ ހިއްސާކުރި މެސެޖުގައި ބުނީ ސޯޝަލް މީޑިއާގައި ރައީސުލްޖުމްހޫރިއްޔާއަށް ނިންބަތްކޮށް މަރުގެ އިންޒާރު ދިން މައްސަލައިގައި ކޯޓު އަމުރެއްގެ ދަށުން ހައްޔަރު ކުރީ ތ. ތިމަރަފުށީ މަލަސް، މަސީހު މޫސާ، 25، ކަމަށެވެ. އަދި އޭނާގެ ފޯނު ވެސް ފުލުހުންގެ ދަށަށް ވަނީ ގެންގޮސްފައިވާ ކަމަށް ބުންޏެވެ.

ރައީސް މުއިއްޒަށް މަރުގެ އިންޒާރު ދީފައިވަނީ ރާއްޖެއަށް ޑުރަގު އެތެރެކޮށް، އެތަކެތީގެ ވިޔަފާރި ކުރުމުގެ ކުށް ސާބިތުވާ މީހުންނަށް މަރުގެ އަދަބު ހިމެނޭހެން ބޮޑެތި އަދަބުތައް ކަނޑައެޅުމުގެ ވިސްނުންފުޅު އެމަނިކުފާނު ގެންގުޅުއްވާތީ އެވެ.

އެކަމާ ރުޅިގަދަވެގެން ރައީސް، އެހެން ވިދާޅުވި ހަބަރު ސޯޝަލް މީޑިއާގައި ހިއްސާ ކުރަމުން އެ ޒުވާނާ ބުނެފައިވަނީ އެންމެ ފުރަތަމަ މަރާލަން ޖެހެނީ ރައީސް މުއިއްޒު ކަމަށެވެ.

މިދިޔަ އަހަރުގެ ސެޕްޓެމްބަރު މަސް ތެރޭގައި ވެސް 'އަބްލޯ މިޔާދު ޔޫސެފް' ނަމަކަށް ކިޔާ އެކައުންޓަކުން ވަނީ ރައީސަށް މަރުގެ އިންޒާރު ދީފަ އެވެ.

އދ.ގެ ގައުމީ އާންމު މަޖިލީހުގެ ހަވާސާގައި ކުރިއަށްދިޔަ އިވެންޓެއްގައި ރައީސް މުއިއްޒު ތަގުރީރު ކުރައްވަނިކޮށް ފޭސްބުކް ލައިވެއްގައި އެ އެކައުންޓުން ވަނީ ރައީސް އަވަހާރަކޮށްލާނެ ކަމަށް ބުނެ އިންޒާރު ދީފަ އެވެ.

މި މައްސަލަ ވަރަށް ސީރިއަސް މައްސަލައެއްގެ ގޮތުގައި އޭރު ފުލުހުން ބެލި އެވެ.