ރައީސް މުއިއްޒު، ސިފައިންނާއި ފުލުހުންނާ ބައްދަލު ކުރައްވައިފި

ރާއްޖޭގެ މިނިވަން ދުވަހުގެ މުނާސަބަތުގައި، ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުއިއްޒު، ދިވެހި ސިފައިންނާއި ދިވެހި ފުލުހުންނާ ބައްދަލު ކުރައްވައިފި އެވެ.

ސޯޝަލް ސެންޓަރުގައި މިއަދު ހެނދުނު އޮތް މި ރަސްމިއްޔާތަށް ރައީސް ވަޑައިގަތުމާއެކު، އެމަނިކުފާނަށް މަރުހަބާ ވިދާޅުވީ، ޑިފެންސް މިނިސްޓަރު މުޙައްމަދު ޣައްސާން މައުމޫނާއި، ހޯމް މިނިސްޓަރު އަލީ އިހުސާނާއި، ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހީމް ހިލްމީ، އަދި ޕޮލީސް ކޮމިޝަނާ އިސްމާއީލް ނަވީން އެވެ.

މި ރަސްމިއްޔާތަށް ވަޑައިގެންނެވުމުން، ރައީސްގެ ޝަރަފުގައި، އެމަނިކުފާނަށް ޝަރަފުގެ ގާޑެއް ވެސް ވަނީ އަރުވާފަ އެވެ.

މި ރަސްމިއްޔާތުގައި އެމަނިކުފާނު ވަނީ، ސިފައިންގެ ތެރެއިން ދިގު މުއްދަތެއްގައި ހިދުމަތް ކުރުމުގެ މެޑެއްޔާއި، މަތިވެރި ހިދުމަތުގެ މެޑެލި އަދި ރައީސުލްޖުމްހޫރިއްޔާގެ މެޑެލި ލިބިވަޑައިގެންނެވި އަސްކަރީންނަށް މެޑެލި ހަވާލު ކޮށްދެއްވާފަ އެވެ.

މީގެ އިތުރުން ފުލުހުންގެ ތެރެއިން ރައީސުލްޖުމްހޫރިއްޔާގެ މެޑެއްޔާއި މަތިވެރި ހިދުމަތުގެ މެޑެލި ލިބިވަޑައިގެންނެވި ފުލުހުންނަށް ވެސް އެމަނިކުފާނު ވަނީ މެޑެލި ހަވާލު ކޮށްދެއްވާފަ އެވެ.

މެޑެލި ހަވާލު ކޮށްދެއްވުމަށްފަހު ރައީސް ދެއްކެވި ވާހަކަފުޅުގައި، ދިވެހި ސިފައިންނާއި ފުލުހުންނަށް ޓަކައި އަދުގެ ސަރުކާރުން ކޮށްދޭންޖެހޭ ކަމެއް، ފަހުރުވެރިކަމާއެކު ކޮށްދެއްވާނެކަމުގެ ޔަގީންކަން ދެއްވި އެވެ. އަދި ރާއްޖޭގެ މިނިވަންކަމާއި ސުލްހަމަސަލަސްކަން ދެމެހެއްޓުމުގައި ދިވެހި ސިފައިންނާއި ފުލުހުން އަދާ ކުރަމުންދާ ހިދުމަތުގެ އަގު ވަޒަން ކުރައްވައި، އެކަން ފާހަގަ ކުރެއްވި އެވެ.

މިނިވަން ދުވަހުގެ މުނާސަބަތުގައި، ރައީސް، ދިވެހި ސިފައިންނާއި ދިވެހި ފުލުހުންނާ ބައްދަލު ކުރެއްވުމަށް ކުރިއަށް ގެންދެވި ރަސްމިއްޔާތު ނިންމާލުމުގެ ކުރިން، ސިފައިންނާއި ފުލުހުންގެ އަޒުމު އައުކުރުން އޮތެވެ.

މިއަދުގެ މި ރަސްމިއްޔާތުގައި ސަރުކާރުގެ އިސްވެރިންނާއި، ދިވެހި ސިފައިންނާއި ފުލުހުންގެ އިސްވެރިންގެ އިތުރުން، ގިނަ އަދަދެއްގެ އަސްކަރީންނާއި ފުލުހުން ބައިވެރިވެވަޑައިގެންނެވި އެވެ.