މިދިޔަ ސަރުކާރުން ފެނަކަ ހިންގުން ހަވާލުކުރީ އެއްވެސް މީހަކަށް ކައިރިނުވެވޭވަރުގެ “ސްޕަރ” އެމްޑީއަކާ ކަމަށާއި، މުޙައްމަދު ސަޢީދުގެ މައްސަލަ ސީރިއަސްކޮށް ބަލަން ޖެހޭކަމަށް މަނަދޫ ދާއިރާގެ ޢިއްޒަތްތެރި މެމްބަރު ޙުސްނީ މުބާރިކް ވިދާޅުވެއްޖެއެވެ.

އަޅުގަނޑުމެންނަށް ފެންނަން މި އޮތީ 4.3 ބިލިއަން ރުފިޔާއިން ކުންފުނި ދަރުވާލާފައި އޮތް ތަން. ކުންފުނި ދަރުވާލާފައި އޮތް އިރު ރައްޔިތުންގެ އަސާސީ ޚިދުމަތް ދެވޭކަށް ނެތް. ކުއްލި މައްސަލަ އަކަށް މިކަން ވެގެން މިއުޅެނީ އެހެން ވެގެން. ގިނަ ރަށްރަށުގައި ކަރަންޓުގެ ޚިދުމަތް މެދުކެނޑެމުން އެ ދަނީ. ވޯލްޓޭޖް ދަށްވުމުގެ ސަބަބުން ކަރަންޓުގެ އެކި ވަޞީލަތްތައް ހަލާކުވަމުން އެ ދަނީ - މިއަދުގެ ޖަލްސާގައި ވާހަކަފުޅު ދައްކަވަމުން ޙުސްނީ ވިދާޅުވިއެވެ.

ޙުސްނީ އިތުރަށް ވިދާޅުވީ މި މައްސަލަ ތަކަކީ ސީރިއަސްކޮށް ބަލަން ޖެހޭ މައްސަލަތަކެއް ކަމަށާއި، އޭސީސީއަށް އެކަނި މިކަން ދޫކޮށްލައިގެން ފަރުޖެހެން ނެތް ކަމަށެވެ. އަދި 5 އަހަރު ނިމިގެންދާއިރު އޭސީސީއަށް މި ކަންކަމުގެ ހައްދު ހޯދައިނުދެވޭކަމަށްވެސް ޙުސްނީ ވިދާޅުވިއެވެ.

މި ވެރިކަން އައިފަހުންވެސް އަޅުގަނޑު ނިޞްބަތްވާ ދާއިރާއަށްވެސް އަލުން ޖެންސެޓެއް ގެނެސްގެން ޚިދުމަތްދޭން މި ޖެހުނީ. މާފަރުގައި، އިންޓަރނޭޝަނަލް އެއާރޕޯޓެއް ހިންގަމުންދާ ރަށެއްގެ ވާހަކަ އަޅުގަނޑު މި ދަންނަވަނީ. އަދިވެސް ކަރަންޓްގެ ޚިދުމަތް ރަނގަޅު ނުކުރެވޭ. ޓްރާންސްފޯމަރުތައް ބެހެއްޓޭކަށްނެތް. އެތަނުގައި ކޭބަލް އަޅަންވެގެން މަސައްކަތްކުރި ފަރާތްތަކަށް، ކުދި ވިޔަފާރިތައް ކުރި މީހުން އެތިބީ ދަރުވާލާފައި.. ކަރަންޓް ކޭބަލް އެޅި މީހުންނާއި މަގު ކޮނުނު މީހުންނަށް ފައިސާ ނުދީގެން އެމީހުން އެޖެހެނީ ދުވަން - ޙުސްނީ ވިދާޅުވިއެވެ.