މޫމިން ފުއާދުގެ "އަބަދަށް"ގެ ވަދާއީ ޝޯ މިރޭ!

ތަޖުރިބާކާރު ޑައިރެކްޓަރު މޫމިން ފުއާދު ލިޔެ، ޑައިރެކްޓް ކޮށްފައިވާ ނޫރު އެން މޫވީސް އިން މި އަހަރު ރިލީޒްކުރި "އަބަދަށް"ގެ ވަދާއީ ޝޯ މިރޭ އޮލިމްޕަހުގައި ދައްކާނެ އެވެ.

މި ފިލްމަކީ ގިނަ ބައެއްގެ ތަރުހީބު ލިބެމުން އަންނަ ފިލްމެކެވެ. މިގޮތުން ފިލްމު ބަލާފައި ނުކުންނަ 99 ޕަސެންޓު މީހުން ކަހަލަ ގޮތަކަށް ވަނީ ފިލްމްގެ ފުރިހަމަކަމާއި ސްޓޯރީ އަދި ފަންނާނުންގެ އެކްޓިންއަށް ތާރީފު ކޮށްފަ އެވެ.

ފިލްމުގެ ވަދާއީ ޝޯގެ ޓިކެޓު އޮލިމްޕަހުން އަންނަނީ ވިއްކަމުންނެވެ.

މި އަހަރު އޮލިމްޕަހުގައި އެންމެ ފުރަތަމަ އެޅުވި ފިލްމު "އަބަދަށް" އަކީ މުޖުތަމައުގައި ހުރި ތަފާތު އެކި ކަހަލަ މައްސަލަތަކެއް ގެނެސްދޭ ފިލްމެކެވެ.

އިޖުތިމާއީ ގިނަ މައްސަލަތަކެއްގެ މައްޗައް އަލިއަޅުވާލާފައިވާ މި ފިލްމުން މުޖުތަމައުއަށް ރަނގަޅު މެސެޖުތަކެއް ފޯރުކޮށްދެ އެވެ.

ފިލްމުގެ ކާސްޓުންނަކީ ޔޫސުފް ޝަފީއު (ޔޫއްޕެ) އާއި އިސްމާއީ ރަޝީދު (ކޮޕީ އިއްސެ) އާއި ވާޝިޔާ މުޙައްމަދު އާއި ޝާރިފް އަހުމަދު އަދި ސޫޒަން އިބްރާހީމްފުޅެވެ.

މި ފިލްމުގެ ޕްރޮޑަކްޝަން ހުރިހާ މަސައްކަތް ތަކެއް މި ފަހަރު ކޮށްފައި ވަނީ މިވަގުތު ރާއްޖޭގެ ފިލްމީ ދާއިރާގައި ފިޔަ ޖަހަމުން އަންނަ ޕްރޮޑަކްޝަން ހައުސް އޯކޭޒް އިންކިންނެވެ. ފިލްމުގެ ސިނަމެޓޯގްރެފީ ބެލެހެއްޓީ ދާއިރާއިން ތަޖުރިބާ ހާސިލު ކޮށްގެން ހުރި ކުޅަދާނަ ކެމެރާމަން ކަނޑި އިބްރާހިމް ވިސާން އެވެ.

މޫމިން ފުއާދު ޑައިރެކްޓް ކޮށްފައިވާ ކާމިޔާބު ފިލްމު ތަކުގެ ތެރޭގައި ހޭލާ، އާއި ލޫދިފާ، ހޭޕީ ބާތުޑޭ އަދި ނިވައިރޯޅި ފާހަގަކޮށްލެވެ އެވެ.