އެމްޑީޕީގެ އިގުތިސާދީ މެނިފެސްޓޯ: ޒަރީރު ސިފަ ކުރެއްވީ ހިންމިތަކުން ދިޔަވާ އޮޑިއެއްގެ ގޮތުގައި
މަތިވެރި ދާއިރާގެ މެންބަރު ހަސަން ޒަރީރު -- ފޮޓޯ. މަޖިލިސް
އެމްޑީޕީ ސަރުކާރުގެ އިގުތިސާދީ މެނިފެސްޓޯއަކީ ހިންމިތަކުން ދިޔަވާ "އޮޑިއެއް" ގޮތަށް މަތިވެރި ދާއިރާގެ މެންބަރު ހަސަން ޒަރީރު ސިފަ ކުރައްވައިފި އެވެ.
އެމްއެމްޓީވީގެ ޕްރޮގްރާމެއްގައި ވާހަކަދައްކަވަމުން ޒަރީރު ވަނީ ރޭ އެމްޑީޕީ ސަރުކާރުގެ އިގުތިސާދީ ސިޔާސަތު ތަކަށް ވަރަށް ބޮޑަށް ފާޑު ކިއުއްވާފަ އެވެ.
މިދިޔަ ފަސް އަަހަރުގެ އިގުތިސާދު، ޒަރީރު ސިފަ ކުރެއްވީ ހިންމިތަކުން ދިޔަވާ އޮޑިއެއް ގޮތުގަ އެވެ.
"ފޭތުވެދިޔަ ފަސް އަހަރު އެ ބޭފުޅުންގެ އިގުތިސާދީ އޮޑި ބައްޓަން ކުރި ގޮތަކީ އެ އޮޑި ދަތުރު ފަށައިގެން ދުއްވަމުން ދަނިކޮށް، އެރީ ފަރަށް. ފަރަށް އަރައިގެން އެ އޮޑީގެ ދަށްބުޑު ހަލާކުވެއްޖެ. މައްޔާވެސް ގުޑައިފި އިނގޭތޯ. ހިންމި ތަކުން ދިޔަ ވަނީ. އިންޖީނު އަޑިއަށް ގޮސްފި. އެ ހާލުގައި އަނެއްކާ ފުން ކުރަން ވެގެން ފަހަތަށް ޖެހިތަނާ ލޮނު އެޅިގެން ޝާފްޓް ހަލާކުވެއްޖެ. ދެން އެ އޮޑި ދުއްވި ގޮތަކީ ރަނގަޅު މަރާމާތެއް ނުކޮށް އިންޖީނު ވެސް ކުރީ ޓޮޕް އޯވަހޯލް އެއް. ދޯނީގައި އެޅީ ޕެޗް. ނަތީޖާ އަކީ އިގުތިސާދީ އޮޑި އެ ދުއްވި ގޮތުން ދެން ޖެހުނީ ހަތަރު އިންޗީގެ ހަތަރު ޕަންޕު ބަހައްޓައިގެން އޮޑި ދުއްވަން،" ޒަރީރު ވިދާޅުވި އެވެ.
ޒަރީރު ވިދާޅުވީ އިގުތިސާދީ އޮޑި އެ އޮތް ގޮތަށް ދުއްވުމުން، ލިބޭ އެއްޗަކަށްވުރެ، ކުރާން ޖެހުނު ހަރަދު ބޮޑުވި ކަމަށެވެ. އަދި އިންޖީނު މަރާމާތު ނުކުރާތީ، ކުރިން އަޅައި ދެ ފީފާގެ ބަދަލުގައި ހަތަރު ފީފާ ތެޔޮ އޭރު އަޅަންޖެހޭ ކަމަށް ވެސް ވިދާޅުވި އެވެ.
"އެހެންވީމަ އެމްޑީޕީ އިގުތިސާދީ އޮޑި އޮތީ މިހާލުގަ. ދެން ވީ ގޮތަކީ މި އިގުތިސާދީ އޮޑި ކުރި ދަތުރުން 124 ބިލިއަން ރުފިޔާއިން ގައުމު ދަރައިފި،" ޒަރީރު ވިދާޅުވި އެވެ.
ރައީސް ޑރ. މުއިއްޒު، ވެރިކަމާ ހަވާލުވިއިރު 124 ބިލިއަނުގެ ދަރަނި އޮތްކަން ފާހަގަ ކުރައްވަމުން ޒަރީރު ވިދާޅުވީ އެ މަނިކުފާނު ދެން ކުރެއްވި ކަމަކީ އިގުތިސާދީ އޮޑި އެއްގަމަށް ނަގައި ރަނގަޅަށް އޯވަހޯލް ކުރުމަށްފަހު އެ އޮޑި އަލުން ދުއްވަން ފެށީ ކަމަށެވެ.
"މިހާރު އެބަ އެނގޭ މި އޮޑި ދަތުރުކޮށް ރާއްޖޭގެ އިގުތިސާދު ހަމަ މަގަށް އަޅުވާނެކަން"
މި މަންޒަރު އިދިކޮޅު ފަރާތްތަކަށް ފެނިއްޖެ ކަމަށާއި މި އޮޑި މިހެން ދާން ދޫކޮށްލައިފި ނަމަ ދެން އަތެއް ނުވާނެކަން ވެސް އެ މީހުންނަށް ޔަގީން ވެއްޖެ ކަމަށް ޒަރީރު ވިދާޅުވި އެވެ.
އޭނާ ވިދާޅުވީ ރައީސް މުއިއްޒު މިގައުމުގެ އިގުތިސާދު ނަގައި ކޮޅަށް ޖަހާނެކަން އިދިކޮޅު ފަރާތްތަކަށް ޔަގީންވާ ކަމަށާއި ގާނޫނު އަސާސީ އޭ ކިޔައިގެން މުޒާހަރާ ކުރަނީ މިހެންވެގެން ކަމަށެވެ.
"މިއީ ގާނޫނު އަސާސީގެ ދިފާއުގައި ކުރާ މުޒާހަރާއެއް ނޫން. މިއުޅެނީ ގައުމު ހަލަބޮލި ކުރަން،" ޒަރީރު ވިދާޅުވި އެވެ.
ކޮމެންޓް