ޓީޖީއެސްޓީ އަށް ގެންނަ ބަދަލާއެކު މާލީ ހާލަތަށް ބޮޑު ލުޔެއް ލިބޭނެ: މުސްތަފާ

މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް ހުށަހަޅާފައިވާ އިސްލާހަށް ބަލާއިރު، މީގެ ކުރީން ޓީޖީއެސްޓީ ބޮޑުކުރި ފަހަރުތަކުގައި 3 ޕަސެންޓްގެ ރޭޝިއޯއަކުން ބޮޑު ކުރިނަމަވެސް މިފަހަރު ގެންނަނީ އެއް ޕަސެންޓްގެ ބަދަލެއް ކަމަށާއި، ބަދަލާއެކު މާލީ ހާލަތަށް ބޮޑު ލުޔެއް ލިބޭނެކަމަށް މާފަންނު ހުޅަނގު ދާއިރާގެ މެންބަރު މުހައްމަދު މުސްތަފާ އިބްރާހީމް މިއަދު ވިދާޅުވެއްޖެއެވެ.

ސަރުކާރުގެ ފަރާތުން މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް ގެންނަ އިސްލާހްގެ ބިލު މިއަދުގެ މަޖިލީހުގެ ޖަލްސާއަށް ހުށަހަޅުއްވައި ދެއްވަމުން މުސްތަފާ ވިދާޅުވީ، މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނު އަކީ2011 ވަނަ އަހަރު ޢަމަލުކުރަންފެށި ޤާނޫނެއް ކަމަށާއި، އެ ޤާނޫނާއި ޤާނޫނުގެ 15 ވަނަ މާއްދާ އެކިފަހަރު މަތިން އިސްލާހް ކޮށްފައިވާ ކަމަށެވެ.

މިގޮތުން މިފަހަރު ވެސް އިސްލާހް ގެންނަ އެ ޤާނޫނުގެ 15 ވަނަ މާއްދާ، ޤާނޫނު ވުޖޫދުވިއިރު ޓީޖީއެސްޓީ 3.5 ޕަސެންޓްގައި އޮތްނަމަވެސް ޖެހިގެން އައި އަހަރު އެ ޢަދަދު ވަނީ 6 ޕަސެންޓަށް އަދި ދައުރު ނިމުނު އިރު 8 ޕަސެންޓަށް އިތުރު ކުރެވިފައިކަން އޭނާ ފާހަގަކުރެއްވިއެވެ. އަދި 2014 ވަނަ އަހަރު އެ އަދަދު ވަނީ ޓީޖީއެސްޓީ 12 ޕަސެންޓަށް އަދި މިދިޔަ އަހަރު 16 ޕަސެންޓަށް ބޮޑުކޮށްފައިކަން އޭނާ ފާހަގަކުރެއްވިއެވެ.

''މި ރޭޝިއޯ އަށް ބަލާއިރު، ކޮންމެ ފަހަރަކު މި ޤާނޫނަށް ބަދަލު ގެންނައިރު 3 ނުވަތަ 4 ޕަސެންޓް ރޭޝިއޯއެއް ވަނީ މަތިކުރެވިފައި، އެއީ 8 ޕަސެންޓުން 12 ޕަސެންޓުން 16 ޕަސެންޓު އަށް، މިފަހަު ސަރުކާރުން ގެންނަވާފައި މިވަނީ ހިތްގައިމު ހިންހަމަޖެހޭ ބަދަލެއް، އެ ރޭޝިއޯގެ 3 ބަދަލުގައި އެންމެ ޕަސެންޓެއް އިތުރުކުރުމުގެ އިސްލާހެއްމީ، މިފަހަރު ހުށަހެޅިގެން މި ދަނީ އެންމެ ޕަސެންޓެއް، އެއީ 16 ޕަސެންޓުން 17 ޕަސެންޓަށް ބަދަލުކުރުން'' މުސްތަފާ ވިދާޅުވިއެވެ.