ޝަރުޢީ ނިޒާމަށް މި ސަރުކާރުން އަތެއް ނުބާނާނެ - މުސްތޮ

ރައީސް ޑރ މުޙައްމަދު މުޢިއްޒަކީ ޝަރުޢީ ދާއިރާއަށް ނުފޫޒު ފޯރުވާނެ ބޭފުޅެއް ނޫން ކަމަށާއި، މި ވީހާތަނަށް ޝަރުޢީ ދާއިރާ މިނިވަން ނުވާ މިންވަރަށް މިހާރު މިނިވަންވެފައިވާކަމަށް މާފަންނު ހުޅަނގު ދާއިރާގެ މެމްބަރު މުޙައްމަދު މޫސްތަފާ އިބްރާޙިމް (އިމްނާ މުސްތޮ) ވިދާޅުވެއްޖެއެވެ.

މުސްތޮ މިހެން ވިދާޅުވީ މެންދުރު ޓީވީގެ “މައުޟޫ” ޕްރޮގްރާމްގައި ވާހަކަފުޅު ދައްކަވަމުންނެވެ.

“ތިބޭފުޅުންނަށް ފެންނާނެ ރައީސް އިބްރާޙިމް މުޙައްމަދު ސޯލިހު ވެރިކަން ވަޑައިގެން އެންމެ ފުރަތަމަ ކުރައްވަން ފެއްޓެވި ކަމަކީ ފަނޑިޔާރުން މަޤާމުން ވަކި ކުރުން. ބާރާ ނުފޫޒު ފޯރުވައިގެން މައްސަލަތައް އެ ބޭފުޅާ ބޭނުން ގޮތަކަށް ނިންމަން މަސައްކަތް ކުރެއްވިތަން ފެންނާނެ” - މުސްތޮ ވިދާޅުވިއެވެ.

އިތުރަށް މުސްތޮ ވިދާޅުވީ ރައީސް ޑރ މުޙައްމަދު މުޢިއްޒަކީ ތިން ބާރު ވަކިވެފައިވާ ނިޒާމެއް ރައްޔިތުންނަށް ކަށަވަރުކޮށްދެއްވާނެ ވެރިއެއް ކަމަށާއި، އެކަން ރައްޔިތުންނަށް މިހާރުވެސް ފެންނަމުން ދާ ކަމަށެވެ.

ރާއްޖޭގެ ޝަރުޢީ ދާއިރާ މިނިވަން ކުރެއްވުމަކީ ރައީސް ޑރ މުޙައްމަދު މުޢިއްޒުގެ ވަޢުދުފުޅުތަކުގެ ތެރޭގައި ހިމެނޭ ކަމެކެވެ.